Տեղեկությունները, որ հայկական կողմը ՌԴ նախագահ Վլադիմիր Պուտինի՝ Գյումրի կայանալիք այցից հետո ռուսական կողմին պատրաստվում է որոշ շենք-շինություններ (Մանկավարժական ինստիտուտի նախկին շենքը եւ Գյուլբենկյանի անվ. հիվանդանոցի շենքը) հանձնել, ՀՀ վարչապետ Տիգրան Սարգսյանը ո՛չ հաստատեց, ո՛չ ժխտեց, միայն նկատեց, որ այդ մասին առաջին անգամ է լսում, այն էլ՝ լրագրողներից: Գյումրին փակ քաղաքի վերածելու մասին լուրերը եւս վարչապետը համարեց ապատեղեկատվություն՝ նշելով, որ Գյումրին ամենաբաց քաղաքն է, եւ այն փակելու վերաբերյալ ծրագրեր չկան:

«Որպեսզի պետական ծառայությունները ռացիոնալ տեղաբաշխվեն քաղաքում, հասանելի լինեն մեր քաղաքացիներին եւ հարմարավետ լինեն, դրա համար նայում ենք բոլոր տարածքները, որ կան մեր տրամադրության տակ: Ոստիկանության տեղակայման խնդիրը գոյություն ունի: Այս պահի դրությամբ մենք ունենք երեք հատ մեծ տարածք, որոնք հանդիսանում են պետական սեփականություն եւ պետք է ճիշտ որոշումներ կայացնենք, տեսնենք, թե այդ շենքերն ում է նպատակահարմար հատկացնել»,- այցի նպատակը մանրամասնեց վարչապետ Սարգսյանը:

Կառավարության ղեկավարը չհստակեցրեց, թե կոնկրետ որ գերատեսչությունը որ շենքում են տեղակայելու՝ նշելով, որ խնդիրը դեռ ուսումնասիրման փուլում է:

 Ի դեպ, Գյուլբենկյանի հիվանդանոցի դատարկ շենքը Շիրակի երկրագիտական թանգարանին հատկացնելու խնդրանքով Գյումրու ավագանին նամակով դիմել էր կառավարությանը, սակայն որեւէ հստակ պատասխան չէր ստացել: Ինչ վերաբերում է նախկին մանկավարժական ինստիտուտի շենքին, ապա ինչպես նշեց Արդյունաբերության զարգացման հիմնադրամի տնօրեն Հայկ Միրզոյանը, շինարարությունը դեռ լիովին ավարտված չէ, բայց իրենք արդեն բազմաթիվ հայտեր են ստացել տեխնոլոգիական ընկերություններից տեղակայման վերաբերյալ:

«Շենքի շինարարությունը կավարտվի տարեվերջին: Իրականացվել է 1մլրդ 670 մլն դրամի աշխատանք:Սա վերածվելու է տեխնոլոգիական կենտրոնի: Առաջին հերթին այստեղ կտեղափոխվեն Գյումրու Տեխնոպարկը՝ իր լաբորատորիայով եւ ուսումնական կենտրոնով, Գյումրու ՏՏ կենտրոնը, «Ռոստելեկոմը» եւ մի շարք այլ ընկերություններ: Կլինի կոնֆերանսների համար նախատեսված սրահ, ցուցասրահ, եւ բոլոր հարմարությունները կլինեն այստեղ այդ ընկերությունների զարգացման համար»,- հավաստիացրեց Հայկ Միրզոյանը:

Այցի շրջանակներում վարչապետն այցելեց նաեւ Գյումրու քաղաքապետարանի նախկին շենք, ծանոթացավ վիճակագրական վարչության շենքի անմխիթար պայմաններին, այցելեց «Սամարիթեր» հիվանդանոց եւ «Ռուսական գրքի տուն»: Վարչապետը եւ նրան ուղեկցող պաշտոնատար անձինք ծանոթացան նաեւ Գյումրու ԳԱԱ Ա. Նազարյանի անվ. երկրաֆիզիկայի եւ ինժեներիայի, սեյսմաբանության ինստիտուտի կիսակառույց շենքի շինաշխատանքներին, որի աշխատանքները սկսվել էին դեռեւս 2006-ին, իսկ ավարտը նախատեսված է 2014-ին: