Այսօր Մոսկվայի Արբիտրաժային դատարանում կայացավ «Միջպետական բանկն ընդդեմ «Rhinoville Property Limited»-ի» գործով դատական նիստը։ Ինչպես մինչ այդ կայացած 4 նախնական լսումների ժամանակ, այս անգամ ևս պատասխանող կողմը բացակայում էր։

Դատական նիստը նախագահում էր դատավոր Ա․Ա․ Կոմարովը։ Հայցվոր կողմն այս անգամ ներկայացնում էին Միջպետական բանկի 2 ներկայացուցիչներ։ Եթե նախորդ լսումների ժամանակ  գումարի չափը նույնն էր մնացել (70  մլն դոլար), ապա այս անգամ բանկը պահանջում է ավելացնել այն 40 մլն դոլարով: 

Միջպետական բանկի և Rhinoville Property Limited -ի միջև կնքվել էր 70 մլն ԱՄՆ դոլարի վարկային համաձայնագիր։ Լրացուցիչ համաձայնագրում վարկի մարման ժամկետ էր նշանակվել 2018թ․։ «Rhinoville Property Limited»-ը կատարել էր վարկի մասնակի վաղաժամկետ մարում 1,4 մլն դոլարի չափով։ Այսնինքն՝ ներկա պահին հիմնական պարտքը կազմում է 68,6 մլն դոլար։

2010թ․ի հունվարի 1-ից  Rhinoville Property Limited-ը  պատշաճ կերպով չի իրականացնում վարկային համաձայնագրի պահանջները, այն է՝ տոկոսների վճարումը, այդ պատճառով էլ Միջպետական բանկը  վարկի վաղաժամկետ մարման պահանջ է ներկայցրել, որը, սակայն, մնացել է անպատասխան։ Այս աումով բանկն ավելացրել է հայցային պահանջները․«Տոկոսային տույժը ներկա պահին դարձել է 23 ,145 մլն դոլար, պայմանագրայինը՝ 16,207 մլն դոլար»։ Այսինքն՝ նախկին 68,6 մլն -ին ավելանում է ևս 39,2 մլն դոլար։

2009թ․ի ապրիլի 9-ին Rhinoville Property Limited և «Նաիրիտ գործարան» ՓԲԸ-ի միջև կնքվել է համաձայնագիր, ըստ որի՝ վարկային գործում դեբիտոր է դառնում  «Նաիրիտը» , որը մինչ այդ հանդիսանում էր երաշխավոր։ Բանկի ներկայցուցիչը, սակայն, հայտնեց, որ իրենք այդ համաձայնագիրը համարվում են չկնքված․ «Այդ պայմանագրի 6-րդ կետի համաձայն՝ կողմերը պետք է լրացուցիչ կարգավորեին իրենց հարաբերությունները
կողմնակի համաձայնագրերով: Բացի այդ, ըստ տվյալ համաձայնագրի 3-րդ կետի՝ պայմանագիր պետք է կնքվեր նաև Միջպետական բանկի հետ այն մասին, որ վարկային պատասխանատվությունն իր վրա է վերցնւոմ «Նաիրիտ գործարան» ՓԲԸ-ն։ Սակայն որևէ համաձայնագիր հետագայում չի կնքվել»։

Ըստ այդմ՝ Միջպետական բանկը շարունակում է պարտատեր համարել Rhinoville Property Limited-ին։
Քանի որ գումարի բռնագանձման չափը զգալիորեն ավելացվել էր, դատավորը որոշեց հետաձգել դատական նիստը մինչ հունվարի 22-ը՝ ժամը 11։20-ն։