Այսօր տեղի է ունեցել ՀՀ կառավարության նիստ, որը վարել է ՀՀ վարչապետ Տիգրան Սարգսյանը։ Նիստից առաջ վարչապետն անդրադարձել է Սանահինի վանական համալիրի խնդրին, որի վերաբերյալ պարզաբանում է տվել ՀՀ մշակույթի նախարարը։ Տիգրան Սարգսյանը հանձնարարել է ուշադրության կենտրոնում պահել ինչպես այդ, այնպես էլ զանգվածային լրատվամիջոցներին հետաքրքրող մյուս հարցերը, մշտապես պարզաբանում տալ դրանց վերաբերյալ: 
Այնուհետև գործադիրը ձեռնամուխ է եղել օրակարգի հարցերի քննարկմանը։ 

ՀՀ կառավարությունը հաստատել է պետության կարիքների համար երթևեկության կանոնների պահպանման նկատմամբ վերահսկողության համակարգերի ձեռքբերման և դրանց շահագործման, սպասարկման ու նորոգման ծառայությունների գնման ծածկագրման ընթացակարգի արդյունքը, ինչի շնորհիվ ենթադրվում է նվազագույնի հասցնել սահմանված արագության գերազանցման և ճանապարհային երթևեկության կանոնների խախտման դեպքերը։ Տարվա ընթացքում ներդրվելու է տեսանկարահանող և լուսանկարահանող սարքերով համակարգ։ Սարքեր են տեղադրվելու 10 խաչմերուկներում և 15 մայրուղիներում։ Վարչապետ Տիգրան Սարգսյանի խոսքով սա երկար սպասված միջոցառում է, որը ոստիկանությանը հնարավորություն կտա ոչ միայն մոնիտորինգ իրականացնել, այլև պատժամիջոցներ կիրառել կարգազանցների նկատմամբ։ Բացի այդ, կնվազի ճանապարհային ոստիկան-վարորդ շփումը, արդյունքում կպակասեն կոռուպցիոն ռիսկերը։ 

Հաջորդ որոշմամբ կառավարությունը, հիմք ընդունելով «Կենսաչափական կողմնորոշիչներ պարունակող էլեկտրոնային անձնագրերի ներդրման աշխատանքների (ծառայությունների) կատարման մրցույթի արդյունքները», նախապատվություն է տվել երկու կազմակերպության և հավանություն` նշված աշխատանքի կատարման պայմանագրի օրինակելի ձևին։ Վարչապետը հիշեցրել է, որ Եվրամիության և Հայաստանի Հանրապետության միջև կնքված համաձայնագրով երկրի քաղաքացիներն առաջին նոր անձնագրերը կարող են ստանալ 2012 թ. առաջին եռամսյակից սկսած։