Մանուշակ Հովակիմյան

Կոտայքի մարզի Բյուրեղավան քաղաքի պոլիկլինիկայի շտապօգնության ծառայությունը քաղաքի ողջ բնակչությանը սպասարկում է «ԳԱԶ 24» մակնիշի մեկ շտապօգնության մեքենայով: Բյուրեղավանցիներից մեկը բողոքում էր, որ ձմռան ամիսներին լինում են դեպքեր, երբ հիվանդատերերը շտապօգնության մեքենան հրելով են տեղից շարժում, քանի որ անվադողերը մաշված են:

«Չնայած նրան, որ պոլիկլինիկան ունի մեկ շտապօգնության մեքենա, այնուամենայնիվ ոչ մի խնդիր չի առաջանում: Բնակչության թիվը մեծ չէ, կանչեր հաճախակի չեն գրանցվում և բուժանձնակազմը ճիշտ ժամանակին գտնվում է տեղում, ոչ մի կանչ չի մերժվում և մեքենայի անվադողերի հետ խնդիրներ բացարձակապես չկան», -ասում է տնօրեն Արմեն Մոսիկյանը:

Պոլիկլինիկան Բյուրեղավան քաղաքում տարվա ընթացքում սպասարկել է բուժօգնության կարիք ունեցող 7000-8000 քաղաքացիների` ներառյալ Արզնի և Նուռնուս գյուղերի բնակիչները: Բժիշկների ասելով` հիմնականում կանչեր գրանցվում են սուր շնչառական, սիրտանոթային համակարգի, շաքարային դիաբետի, ինֆարկտի, ինսուլտի խնդիրներով, սեզոնային բնույթ կրող տրավմաներով, օրինակ`ձմռանը բնորոշ կոտրվածքները, որոնց թիվը հասնում է 7-8 դեպքի:

«Ներկայումս երիտասարդացել են հետևյալ հիվանդությունները` շաքարային դիաբետը, լեյկոզները, ստամոքսային-աղիքային հիվանդությունները, կանանց մոտ լյարդի ցերոզը և հիպերտոնիան: Բացի վերը թվարկված հիվանդություններից՝ առավել երիտասարդացել է տուբերկուլոզը»,- ասում է բժշկուհի Մարինա Բաղդասարյանը:

Բուժքույր Լյուդմիլա Կաղյանն ավելացնում է, որ լինում են դեպքեր, երբ հիվանդի վիճակը շատ ծանր է լինում ու ազգականներին թվում է, թե շտապօգնությունը ժամանակին տեղ չի հասնում եւ դրանով էլ պայմանավորված է իրենց նկատմամբ երբեմն ցուցաբերված անհարգալից վերաբերմունքը:

«Լինում են դեպքեր, երբ անիմաստ ժամանակ ենք վատնում, մարդիկ զանգում են ու առանց հստակ պատճառ ներկայացնելու ասում են` շտապ հասեք, շատ ծանր է վիճակը, բայց գնալուն պես՝ պարզվում է, որ օղին մի փոքր չարաշահել է և իրեն այդքան էլ լավ չի զգացել»,- ավելացնում է Լ. Կաղյանը: