Այսօր «Ժառանգություն» խմբակցության պատգամավոր Անահիտ Բախշյանը ՀՀ վարչապետ Տիգրան Սարգսյանին ուղարկել է նամակ է, որում վերջերս հիշեցնում է մարզպետների գործունեությանը Կառավարության տված բարձր գնահատականները` միաժամանակ վկայակոչելով հանրակրթության ոլորտում առկա աղետալի վիճակը, որի համար պատասխանատվության իրենց բաժինն ունեն նույն «բարձր» գնահատանքի արժանացած մարզպետները:

«Ժառանգության» պատգամավորի նամակում մասնավորապես ասվում է.

«Վերջերս մարզպետները գնահատվեցին ՀՀ տարածքային կառավարման, գյուղատնտեսության, քաղաքաշինության, ֆինանսների, կրթության նախարարությունների և մի շարք այլ գերատեսչությունների կողմից: Բարձր են գնահատվել մարզպետներ, որոնց ենթակայության հանրակրթական դպրոցներում կրթության որակը, ըստ Գիտելիքների գնահատման և թեստավորման կենտրոնի, հանրակրթական ուսումնական հաստատություններում 2010-2011թթ. անցկացրած 6 տիպի արտաքին ընթացիկ գնահատման արդյունքների, միջինից ցածր է` 10-ից 4.5 միավոր:

ՀՀ պաշտպանության նախարարության 2010 թ. ցուցանիշներով Ազգային բանակում 259 անգրագետ զինվորները նաև մարզպետարանների վատ աշխատանքի արդյունք են:

Երեխաների կրթության իրավունքը մարզերում անհասանելի է կրթության առանձնահատուկ պայմանների կարիք ունեցող շատ երեխաների համար. նրանք զրկված են իրենց սահմանադրական իրավունքի իրացումից: Որոշ դպրոցներում տարածված են երեխաների պատիվն ու արժանապատվությունը ոտնահարող, ՀՀ գործող օրենսդրությամբ պատժելի բռնության դեպքեր: Որոշ դպրոցների տնօրենների նկատմամբ հարուցված են կաշառակերության, կեղծարարության, աշակերտին ծեծելու և հայհոյելու համար քրեական գործեր, որոնք օրինական ընթացք չեն ստանում:

Ստիպված եմ հերթական անգամ բարձրաձայնել. մարզպետների համար դպրոցներն ընդամենը ընտրություններում իրենց և իշխանության համար ձայն ապահովողներ են, տնօրենների մեծ մասը` իրենց կողմից կառավարելի: Տնօրենները մարզպետի կողմից գնահատվում են` ոչ թե ըստ աշակերտների ստացած գիտելիքների գնահատականների կամ դպրոցում ստեղծված առողջ բարոյահոգեբանական մթնոլորտի, այլ ծառայամտության ու ապօրինությունների մեջ համագործակցելու համար:

Եթե Կառավարությունը հետևում է լրատվությանը, ապա չի կարող անտարբեր մնալ այն ամենին, ինչ կատարվում է, օրինակ, Գյումրու Սլաբոդկա թաղամասի թիվ 1, Էջմիածնի թիվ 2 ավագ, Երևանի թիվ 68 դպրոցներում, կամ էլ Ապարանի թվով 9 դպրոցներում Վերահսկիչ պալատի բացահայտած 21.5 մլն դրամի հավելագրումներին:

Խնդրում եմ «ԱԺ կանոնակարգ» ՀՀ օրենքի 7-րդ հոդվածի համաձայն` 10-օրյա ժամկետում պատասխանել, թե որքանով են Ձեզ հետաքրքրում վերոնշյալ դպրոցների տնօրենների նկատմամբ հարուցված քրեական գործերը, և որքանով եք համաձայն, որ Կառավարության կողմից մարզպետների գնահատման չափորոշիչները չեն բխում կրթության ոլորտում առկա վտանգները վերացնելու պետական անվտանգության շահերից»: