![](/static/articles/31/65/l-K2ySGCLug2.jpg)
Արարատի նախկին մարզպետը ոստիկանապետի մասին. «Ինքն իմ երեսը չի ուզում տեսնի»
Մի քանի օր է՝ Արարատի նախկին մարզպետ Վարդգես Հովակիմյանը հրավիրվում է Հատուկ քննչական ծառայություն եւ ժամեր շարունակ հարցաքննվում:
Հիշեցնենք, որ հուլիսի 19-ին նրան մեղադրանք է առաջադրվել ՀՀ քրեական օրենսգրքի 308-րդ (պաշտոնական դիրքի չարաշահում) եւ 38-314-րդ հոդվածների 1-ին մասերի (պաշտոնական կեղծիք), 315-րդ հոդվածի 2-րդ մասի (պաշտոնական անփութություն, որն առաջացրել է մահ) հատկանիշներով: Արարատի նախկին մարզպետի նկատմամբ որպես խափանման միջոց է ընտրվել ստորագրություն չհեռանալու մասին որոշումը:
Վարդգես Հովակիմյանը «Հետքի» հետ զրույցում նորմալ է վերաբերվում հարցաքննությանը. «Նորմալ է, հարցաքննության մեջ եմ, դեռ մարդկանց պետք է կանչեն հարցաքննեն»:
Ներկայացնում ենք նրա հետ մեր հեռախոսազրույցը:
Պարոն Հովակիմյան, ո՞ր պահից սկսած լարվեցին Ձեր հարաբերությունները ոստիկանապետ Ալիկ Սարգսյանի հետ:
Ախր, ո՞վ ասաց, որ լարվել են հարաբերությունները… Կարգավորվել է արդեն:
Հիմա ոստիկանապետի հետ հարաբերությունները լարված չե՞ն:
Ոչ շփվում եմ, ոչ էլ: Ես արդեն մեկ տարի է՝ աշխատանք չունեմ, ինչի՞ պիտի նրա հետ շփվեմ: Ինքն իմ երեսը ոչ ուզում է տեսնի, ոչ էլ ես նրա հետ կարողանում եմ շփվել: Ոչ էլ դրա ցանկությունը կա մեր կողմից:
Ձեր մարզպետ եղած տարիներին վա՞տ հարաբերություններ ունեիք:
Ոչ, ինքն իմ ընկերն է եղել, լավ հարաբերությունների մեջ ենք եղել:
Այդ դեպքում, ինչո՞ւ Ձեր ընկերները Ձեզ «դավաճանեցին»: Նախ՝ Ձեր դեմ քրեական գործ հարուցվեց, հիմա էլ ներկայիս մարզպետը չի ցանկանում Ձեր լուսանկարը փակցնել Արարատի մարզպետների նկարների կողքին:
Լոնդիկն իմ ընկերը ոչ մի անգամ չի եղել, ուղղակի ճանաչել ենք իրար: Նորմալ հարաբերություններ եմ ունեցել: Ինքն այդ ժամանակ եղել է փրկարար ծառայության ղեկավար, ես սիրով նրան հրավիրել եմ, եկել է մարզ, հարցեր ենք քննարկել, ոչ մի անգամ վատ հարաբերություններ չենք ունեցել, մեկս մյուսին հարգել ենք:
Թե ինչի է այդպիսի բան ասել, թե չի ցանկացել իմ նկարը փակցնել, չգիտեմ: Ինքն էլ կգնա, նոր մարզպետ կգա, կարողա նոր մարզպետն էլ իրա նկարը չցանկանա փակցնել, ի՞նչ է եղել: Նկար փակցնելու խնդիր որեւէ մարզում Դուք տեսե՞լ եք:
Ես եմ եղել դրա հեղինակը, որ մարզպետների նկարները փակցվի: Վերջերս, որ շատ շփվեցի արխիվների հետ, նոր հասկացա, թե ինչու մեր պետությունը չի կայանում: Որովհետեւ մեր արխիվները բոլորը լցրել են աղբարկղերը: Եթե արխիվները պահպանեն, մեր սերունդները կհասկանան՝ ինչ է նշանակում հայը ու հայկական պետությունը:
Այս ընթացքում ԱԺ նախագահ Հովիկ Աբրահամյանը՝ որպես Արարատի նախկին մարզպետ, կապ հաստատե՞լ է Ձեզ հետ, եւ ի՞նչ հարաբերություններ ունեք նրա հետ:
Հովիկ Աբրահամյանի հետ շատ լավ հարաբերություններ ունեմ: Նրան չի կարելի համեմատել Ալիկ Սարգսյանի հետ:
Չէ, իրար հետ չենք խոսել: Ես ինքս էլ ցանկություն չեմ ունեցել, որովհետեւ գիտեմ, որ դրա մեջ ոչ մի բան չկա, ամեն ինչ կկարգավորվի, կընկնի տեղը:
Հույս ունեք, որ գործը կկարճվի, եւ Դուք կարդարացվե՞ք:
Չեմ կարող ասել՝ գործը կկարճվի կամ ինչ կարվի, բայց ես այդ անձնավորությունը չեմ: 56 տարեկան տղա եմ, 24 տարեկանից հիմնարկներ եմ ղեկավարել, ոչ մի անգամ իմ շրջապատում այնպիսի բան չի եղել, որ ինձ մեղադրեն: Հո մեղադրելով չի՞, ասելով չի՞: Պիտի այդ մեղադրանքը ապացուցեն:
Մեկնաբանություններ (1)
Մեկնաբանել