Երեկ «Հետքը» նյութ էր հրապարակել Դսեղում խոզերի անկման մասին, որում գյուղապետ Նորիկ Քոչարյանը դժգոհել էր նախարարության «Անասնաբուժասանիտարիայի, սննդամթերքի անվտանգության եւ բուսասանիտարիայի ոլորտի ծառայությունների կենտրոն» ՊՈԱԿ-ի ղեկավար Արմեն Ավագյանից, քանի որ վերջինս հրաժարվել էր ստորագրել Դսեղ համայնքի խոզերի զանգվածային անկման ախտորոշումը ճշտող հանձնաժողովի նիստի արձանագրությունը:  

Ըստ գյուղապետի՝ փոխնախարար Բաղյանը հայտարարել է, թե վնաս կրած գյուղացիներին փոխհատուցում չի տրվելու, իսկ Արմեն Ավագյանը «այստեղ-այնտեղ պարծեցել է, թե ինքը «գոռալով բոլորի բերանը փակել է»»: «Հետքը» փորձեց գյուղապետի հայտարարությունների վերաբերյալ պարզաբանում ստանալ գյուղատնտեսության նախարարի առաջին տեղակալ Գրիշա Բաղյանից:

 -Պրն  Բաղյան, ինչպես եք մեկնաբանում գյուղապետի հայտարարությունը Արմեն Ավագյանի «գործողությունների» մասին:

-Ես երևի հետագայում՝ Նոր տարուց հետո հարցը կքննարկեմ, տեսնեմ՝ ինչն ինչոց է ու կպատասխանեմ: Ես սպասեցի հաստատվի, որ, իրոք, նման բան եղե՞լ է, թե՞ չի եղել:

-Իսկ խոզերի անկման արդյունքում վնաս կրած գյուղացիներին փոխհատուցում տրվելու՞ է, թե՞ ոչ:

-Դա գյուղնախարարությունը չի որոշում: Երբ այդ հիվանդությունը լաբորատորիան հաստատում է, հաստատելուց հետո համայնքում կա հանձնաժողով, հանձնաժողովի անդամները՝ գյուղապետի գլխավորությամբ, համապատասխան ակտը կազմում-լրացնում են, ուղարկում կառավարություն՝ հետագա ընթացք տալու համար: Կառավարությունն ուղարկում է լիազոր մարմնին, լիազոր մարմինը տեսչությունն է, որից հետո հարցին ընթացք է տրվում: Եթե նպատակահարմար են գտնում, տալիս են, եթե նպատակահարմար չեն գտնում կամ միջոցներ չեն լինում, չեն տալիս: Կարգը սա է: