Արսեն Վարդանյան

Թերեւս բնության օրինաչափությունը պահելու համար է, որ Հայաստանի ամենացուրտ վայրում՝ Աշոցքում, ամենատաք ու ջերմ սրտերով մարդիկ են ապրում: Այս տարածաշրջանում գրեթե նույն խնդիրներն են, ինչ ամբողջ հանրապետությունում: Աշոցքում երկրաշարժից 25 տարի անց, դեռ հրատապ է անօթեւանության խնդիրը: 1989թ.-ին գյուղի Կոճոռ կոչվող թաղամասում երկհարկանի բազմաբնակարան փայտե քոթեջներ կառուցվեցին, որոնք պիտի ժամանակավոր կացարան ծառայեին բնակիչների համար:

Ներկայումս 164 բնակարանից բնակեցված է 130-ը: Տարիների ընթացքում առաջ են եկել բազմաթիվ խնդիրներ եւ այս բնակարաններն այլեւս ենթակա չեն բնակության համար: Քաղաքաշինության նախարարության հանձնարարությամբ ուսումնասիրություններ են կատարվել եւ ժամանակավոր կացարանների բնակիչներին տեղյակ է պահվել, որ իրենց խնդրին կանդրադառնան, երբ Գյումրիում եւ որոշ գյուղական համայնքներում ավարտեն անօթեւաններին բնակարաններով ապահովելու հարցը:

«Դրանից հետո նոր Կառավարությունը խոստացել է զբաղվել փայտե բնակարանների ճակատագրով,- ասում է Աշոցքի փոխհամայնքապետ Կարեն Ապրեյանը: Վերջինս տեղեկացնում է մեկ այլ խնդրի մասին, բազմաբնակարան քարե շենքերից մեկն է ճաքեր տվել եւ վտանգավոր է այդտեղ ապրելը: Ութ ընտանիքի պատրաստվում են հանրակացարանի կարգավիճակով տեղ հատկացնել գործող դպրոցի մի մասնաշենքում, որտեղ նորոգման աշխատանքներ են ընթանում: «Խնդրի մասին ահազանգել ենք Շիրակի մարզպետարանին, որոշում է կայացվել եւ պետբյուջեից գումար է հատկացվել՝ աշխատանքները հավուր պատշաճի կազմակերպելու համար»,- տեղեկացնում է փոխհամայնքապետ Ապրեյանը:

Կ. Ապրեյանի փոխանցմամբ, այս տարի Սոցներդրումներ հիմնադրամի աջակցությամբ վերանորոգել են մանկապարտեզի շենքը: Համայնքի ներդրումն այս ծրագրով կազմել է 4 մլն դրամ: Սեփական եկամուտների հավաքագրումից շատ չեն դժգոհում: Եթե 2012թ.-ի դեկտեմբերի 1-ի դրությամբ սեփական եկամուտների հավաքագրումը կազմում էր 37.681.7 հազար դրամ, ապա այս տարվա դեկտեմբերի 1-ի դրությամբ՝ 43.215.5 հազար դրամ:

Կրկին անդրադառնալով համայնքի խնդիրներին, Կարեն Ապրեյանն առանձնացրեց կաթի եւ մսի մթերման գները, որոնք այդքան էլ ձեռնտու չեն գյուղացուն: Կոճոռ թաղամսի բնակիչ Կարեն Առաքելյանը դժգոհեց, որ միսն իրենցից գնում են 1000 դրամով՝ շուկայում վերավաճառում մի քանի անգամ թանկ գնով, իսկ կաթի գինը տատանվում է 140-ից 170 դրամի սահմաններում:

Գյուղից այս տարի արտագնա աշխատանքի է մեկնել 131 մարդ, նրանցից 10-12-ը՝ ընտանիքներով: Ծնելիությունը պակասել է Աշոցքում, եթե 2012թ.-ին գրանցվել էր 33 ծնունդ, ապա այս տարի ընդամենը՝ 29-ը (14 տղա եւ 15 աղջիկ): Աշոցքից 3 պատանիներ՝ Սերգեյ Միքայելյան, Արթուր Եղոյան, Թադեւոս Պողոսյան, ներկայումս Ֆինլանդիայում են,  մասնակցում են դահուկավազքի վարկանիշային մրցաշարին եւ Սոչիի 2014 թվականի օլիմպիական խաղերի մասնակցության վարկանիշ են ձեռք բերել: Սերգեյ Միքայելյանի մայրն ու հայրը՝ Արթուր եւ Ալլա Միքայելյանները, ժամանակին եւս զբաղվել են դահուկավազքով: Մի քանի տարի առաջ նրանք երկրի նախագահի կողմից ճանաչվել են «Լավագույն մարզական ընտանիք»:

Աշոցք