Սիրելի հայրենակիցներ,

Փետրվարի 19-ին դուք կանգնելու եք ձեր ապագան սեփական ձեռքերով կերտելու լրջագույն պատասխանատվության առջեւ։

Սերժ Սարգսյանի ընտրության պարագայում մեր երկրում որեւէ դրական տեղա­շարժ չի լինելու, այլ ընդհակառակը, ավելի են ծավալվելու այն բո­լոր արատավոր երեւույթները, որոնք առկա էին Ռոբերտ Քոչարյանի նախա­գահության օրոք, այսինքն.

– Շարունակվելու է ժողովրդի անխնա կեղեքումը եւ ազգային հարստության կուտա­կումը փոքրաթիվ մարդկանց ձեռքում.

– Խորանալու է հասարակության բեւեռացումը. հարուստներն ավելի են հարստա­նալու, իսկ աղքատներն՝ ավելի աղքատանալու.

– Տնտեսության ահագնացող մոնոպոլիզացումը վերջնականապես սպառնալու է միջին եւ մանր գործարարության գոյությանը.

– Չեն դադարելու իրավապահ մարմինների, հարկային տեսչության, մաքսային վարչության կամայականություններն ու օրինազանցությունները.

– Արտագաղթի շարունակվող գործընթացը վերածվելու է դեմոգրաֆիական աղետի.

– Վիժեցվելու է աննախադեպ հանցագործությունների՝ 1999-ի հոկտեմբերի 27-ի ահա­բեկ­չության, քաղաքական մյուս սպանությունների, բենզինի ու գազի ներկրման հետ կապված մեքենայությունների բացահայտումը.

– Չի հաղթահարվելու Հայաստանի քաղաքական եւ տնտեսական մեկուսացումը. մեծանալու է Լեռնային Ղարաբաղում պատերազմի վերսկսման վտանգը։

Մինչդեռ իմ ընտրության պարագայում տեղի է ունենալու նշված փակուղային զար­գացումների ճիշտ հակառակը, այն է՝ ավազակապետական համակարգի կազ­մա­քան­դում, սահմանադրական կարգի վերականգնում, ժողովրդավարական ազատու­թյուն­ների կենսագործում, օրինականության հաստատում, տնտեսավարողների համար հավասար հնարավորությունների ստեղծում, ազատ մրցակցության ապահովում, սե­փա­կանության անձեռնմխելիության երաշխավորում, կառուցողական արտաքին քաղա­քա­կանության իրականացում եւ այլն։ Գումարած՝ ժողովրդի սոցիալական վիճակի կտրուկ բարելավմանն ուղղված այն բոլոր միջոցառումները, որոնք արտացոլված են իմ ծրագրում։ Դրանք են.

– Առաջիկա հինգ տարիների ընթացքում միջին աշխատավարձի եռակի եւ միջին կենսաթոշակի քառակի բարձրացումը.

– Պետական պարտատոմսերի թողարկման միջոցով քաղաքացիների խորհրդային ավանդների հատուցման արագացումը.

– Երեխաների ծննդյան համար մայրերին տրվող միանվագ նպաստների զգալի հավելումը.

– Զինվորական ծառայությունից խուսափած երիտասարդների նկատմամբ համա­ներման կիրառումը.

– Բուհական ուսման վարձերի ձեւավորման կանոնակարգումը եւ դրանց աճը զսպող մեխանիզմների մշակումը.

– Պետության կողմից սոցիալական շինարարության լայնածավալ ծրագրի իրա­կանացումը, եւ այլն։

Ընտրությունն, այսպիսով, կայանալու է ոչ թե անհատների, այլ երկրի զարգացման երկու հնարավոր ճանապարհների միջեւ, որոնցից մեկը անխուսափելի կործանման, մյու­սը՝ փրկության ճանապարհն է։ Այլ կերպ ասած՝ մեկը ներկա ավազակապետական վարչախմբի եւս տասը տարվա տիրապետության մղձավանջն է, մյուսը՝ նորմալ պետու­թյուն կառուցելու հեռանկարը։

Ամեն ինչ կախված է ձեր կամքից ու վճռականությունից, ձեր քաղաքացիական պարտքը կատարելու պատրաստակամությունից, երկրի ապագայի կերտումը ձեր սե­փա­կան գործը համարելու գիտակցությունից։

Կատարեք ձեր պարտքը, եւ ոչ մի դաժանաբարո ուժ, ոչ մի բռնություն, ոչ մի ընտրակեղծիք չի կարող կասեցնել մեր ընդհանուր հաղթանակը։

24 հունվարի, 2008 թ.