Ամանորի և Սուրբ ծննդյան տոնական օրերին ամենուր կարելի է հանդիպել Ձմեռ պապերի, որոնց հետ շատերը լուսանկարվում են: Այդ գեղեցիկ ավանդույթն ինքնին հետաքրքիր է, բայց չգիտես ինչու մտքովս անցավ, որ կարելի է մի թեթև խախտել այդ ավանդույթը` «գործող անձանց» դերերը փոխելով: Որոշեցի մի որոշ ժամանակով դառնալ Ձմեռ պապ, այդ կերպարով շրջել Երևանի կենտրոնական փողոցներում, կոնֆետներ բաժանել ճանապարհին պատահած բոլոր անցորդներին ու... լուսանկարել: Այո, ճիշտ հասկացաք, այս ֆոտոպատմության հեղինակը հենց Ձմեռ պապն էր: Հրաշալի էր, որ քաղաքացիներն ամանորյա հեքիաթի այս փոքրիկ փոփոխությունը մի փոքր զարմանքով, բայց նաև ուրախությամբ ընդունեցին: 

Հետաքրքիր պատահականությամբ Ձմեռ պապին առաջինը պատահած «թոռնիկը» զբոսաշրջիկ էր:

Հյուսիսային պողոտայի ամանորյա տաղավարներում կարելի է տաք գինի համտեսել:

Հետո ուղղակի պարտավոր ես լուսանկարվել այս «գինովցած» տոնածառի կողքին:

Ձմեռ պապի այս թոռնիկները բոլոր ցանկացողներին առաջարկում էին սուրճ համտեսել:

Պապը, լուսանկարելուց բացի, նաև կոնֆետներ բաժանելով էր զբաղված:

Այս փոքրիկին կոնֆետ ուտել դեռ չի կարելի. դե, այդպես ասաց նրա մայրիկը:

Իսկ նա (ասում են) ինչ-որ ամանորյա հեքիաթից էր փախել:

Այո, առանց սոուսի հոդ-դոգը ուղղակի հաց ու նրբերշիկ է:

Ում մտքով կանցնի, որ քաղաքում -18 է:

Իրականում կանաչապատմամբ եմ զբաղվում, ուղղակի բաճկոնս է նարնջագույն:

Նրա հայրենիքում ամանորն ուրիշ օր են նշում, բայց դա չի խանգարում լուսանկարվել ձնեմարդու հետ:

Ձմեռ պապի սիրելի թոռնիկները:

Նրանց լեզվով Ձմեռ պապը չգիտես ինչու Պապ-սառնամանիք է:

Նա համոզվեց, որ Ձմեռ պապի հեքիաթն իրական է:

Նրանք նույնպես. դե, համենայն դեպս, այդպես ասացին:

Իսկ նա իր սեփական հեքիաթներն ուներ:

Մի քանիսը պատմեց Ձմեռ պապին:

Այս երկուսի հեքիաթում գլխավոր հերոսը սերն ու նվիրվածությունն են:

Տարօրինակ թող չթվա որ Ձմեռ պապն էլ է ստիպված համակարգչի դիմաց նստել. դե, գոնե այս փոքրիկ հեքիաթի մասին պատմելու համար: