Բուլղարիայի մայրաքաղաք Սոֆյայում տեղի ունեցավ  ”New Wave”  («Նոր ալիք») միջազգային ուսանողական կինոփառատոնի մրցանակաբաշխությունը։ 

Երեւանի թատրոնի եւ կինոյի պետական ինստիտուտի ներկայացուցիչը վերադառանում է Հայաստան՝ իր հետ բերելով երկու մրցանակ։ 

‹‹Լավագույն մոնտաժ›› անվանակարգում հաղթել է Արեն Մալաքյանի ‹‹Սիրո խոստովանություն ճապոնական ոճով››, իսկ  ‹‹Լավագույն ձայնային մոնտաժ›› անվանակարգում՝ Անդրանիկ Հարությունյանի ‹‹Հեքիաթ››  կարճամետրաժ ֆիլմերը։ 

Ինչպես ավելի վաղ հայտնեց Սոֆյայում անցկացվող կինոփառատոնի մեր մասնակից Արեն Մալաքյանը՝ պայքարը թեժ է լինելու, որովհետեւ հիմնական ֆավորիտների ցանկում Գերասիմովի անվան կինոմատոգրաֆիայի համառուսաստանյան պետական համալսարանի ուսանողների դիպլոմային աշխատանքներն են։ 

Մրցանակաբաշխության արդյունքների ժամանակ Արեն Մալաքյանի ֆիլմը հայտնվել է Գրան պրիի հավակնող երեք ֆիլմերի ցանկում, որոնցից մյուս երկուսը ներկայացնում էին Կինեմատոգրաֆիայի համառուսաստանյան պետական համալսարանը։

Ընդհանուր մրցանակների եւ նոմինացիաների թվով Հայաստանը փառատոնում տեղը զիչել է միայն ՌԴ ներկայացուցիչներին։ 

Հիշեցնենք, որ Բուլղարիայի մայրաքաղաք Սոֆյայում  հունվարի 23-ից 25-ը անցկացվում էր ”New Wave”  («Նոր ալիք») միջազգային ուսանողական կինոփառատոնը:

Երեւանի թատրոնի եւ կինոյի պետական ինստիտուտը ներկայացնող 5 ուսանողներից 4-ի ֆիլմերը անցել էին ընտրության նախնական փուլը, ապա մաս էին կազմել մրցութային 29 ֆիլմերի: