ՀՀ գյուղատնտեսության նախարար Սերգո Կարապետյանն այսօր  ընդունեց Հայաստանի Հանրապետությունում Ռումինիայի նորանշանակ արտակարգ և լիազոր դեսպան Սորին Վասիլեին:

Շնորհավորելով նրան պատասխանատու պաշտոնում նշանակվելու կապակցությամբ՝  նախարարն անդրադարձավ Հայաստանի  գյուղատնտեսության ոլորտում առկա զարգացումներին, ներկայացրեց գյուղում իրականացվող պետական օժանդակության ծրագրերը: Ոլորտի  առաջնահերթությունների շարքում նախարարը հիշատակեց հողերի լիարժեք և արդյունավետ մշակման, գյուղատնտեսական կոոպերացիայի համակարգի ներդրման, սննդամթերքի անվտանգության կարողությունների ուժեղացման, անասնաբուծության և տոհմային գործի բարելավման, սերմարտադրության զարգացման հարցերը:

Դեսպան Վասիլեն պատրաստակամություն հայտնեց աջակցել Հայաստանի և Ռումինիայի գյուղատնտեսության նախարարությունների միջև կապերի սերտացմանը:

Հանդիպման ավարտին դեսպանը ՀՀ գյուղատնտեսության նախարարին փոխանցեց   Ռումինիայի գյուղատնտեսության և գյուղի զարգացման նախարար Դ. Կոնստանտինի  2014 թվականի ապրիլի 1-4-ը Բուխարեստում կայանալիք ՄԱԿ-ի պարենի և գյուղատնտեսության կազմակերպության /ՊԳԿ/ եվրոպական տարածաշրջանային 29-րդ համաժողովին և ՊԳԿ-ի գյուղատնտեսության եվրոպական հանձնաժողովի 38-րդ նստաշրջանին մասնակցելու հրավերը:

Հայտնում են Գյուղատնտեսության նախարարության մամուլի ծառայությունից: