![](/static/articles/32/40/l-nFc1K0CUfu.jpg)
1 մլն դրամ աշխատավարձով վստահություն չվայելող դատավորներ
2011 թ. առաջին եռամսյակում Հայաստանի թվով 25 դատավորներ ամսական ստացել են 800.000 դրամ եւ ավելի բարձր աշխատավարձ: Նրանցից 8-ի աշխատավարձը գերազանցել է 1մլն դրամը: Բարձր աշխատավարձ ստացող դատավորների թիվն այս տարի ավելացել է: Նախորդ տարի նրանք եղել են 23-ը, որոնցից 1 մլն եւ ավելի բարձր աշխատավարձ ստացել է 7-ը:
Կոռուպցիայի դեմ պայքարի շրջանակներում 2009 թ. հունվարից գրեթե կրկնակի բարձրացվեց 216 դատավորների աշխատավարձը: Կողմ քվեարկող կոալիցիոն պատգամավորները հայտարարում էին, թե աշխատավարձերի բարձրացումը կնվազեցնի կոռուպցիայի մակարդակը համակարգում: Թե որքանով է կոռուպցիան համակարգում նվազել, հայտնի է բոլորիս: Դրա վառ օրինակը Կառավարության պատվերով «Էյ Փի Էս Սի» քաղաքական եւ սոցիոլոգիական խորհրդատվությունների ինստիտուտի՝ այս տարեսկզբին անցկացրած սոցիոլոգիական հարցումն է: Հարցվածների 19.2 տոկոսի կարծիքով՝ դատաիրավապահ համակարգում կոռուպցիան նվազել է, 46.7 տոկոսն ասել է, որ այն մնացել է նույնը, իսկ 29.8 տոկոսի հավաստմամբ՝ աճել: Միայն 4.2 տոկոսն է վստահ ասել, որ համակարգում կաշառակերություն չկա:
Միեւնույն ժամանակ, հարցվածների 22.8 տոկոսի կարծիքով՝ դատաիրավապահ համակարգում գոյություն ունեն ոչ միայն կաշառակերության դրսեւորումներ, այլեւ՝ համակարգի վատ աշխատանք, օրենքի բացակայություն, չկիրառություն, մարդու իրավունքների խախտում, խտրականություն եւ այլն:
Դատարանները շարունակում են հասարակության համար մնալ անվստահելի, իսկ դատավորներն ամենեւին էլ արդարադատի համբավ չունեն:
Ընդհակառակը, հաճախ հենց դատարաններում են խախտվում մարդու իրավունքներն ու ազատությունները: Այդ կարծիքին է հարցված քաղաքացիների 63.1 տոկոսը: Ըստ նույն հարցման՝ օրենքի խախտման միջին գնահատականը դատաիրավապահ համակարգի համար 6 է, ինչն ամենաբարձրն է մնացած ոլորտների համեմատությամբ: «Արդարադատություն» իրականացնող դատավորները նպաստ-թոշակ ստացող քաղաքացիների վճարած հարկերի հաշվին ամեն ամիս կլորիկ աշխատավարձ են ստանում:
Այս տարվա առաջին եռամսյակում Հայաստանում ամենաշատ վարձատրվող դատավորը եղել է Վճռաբեկ դատարանի քրեական պալատի նախագահ, դատավորների էթիկայի հանձնաժողովի նախագահ Դավիթ Ավետիսյանը: Նա ամեն ամիս ստանում է 1 մլն 238 հազ. 684 դրամ աշխատավարձ: Դ. Ավետիսյանի նախորդ տարվա աշխատավարձը կազմել է 1 մլն 234 հազ. 434 դրամ:
Ցուցակում երկրորդը ՀՀ վերաքննիչ քրեական դատարանի դատավոր Մարգո Սիմոնյանն է՝ ամսական 1 մլն 161 հազ. 860 դրամ աշխատավարձով: Մ. Սիմոնյանի նախորդ տարվա աշխատավարձը ընդամենը 500 դրամով է պակաս եղել այս տարվա ստացածից:
Միլիոնատեր դատավորների թվում է նաեւ Վճռաբեկ դատարանի դատավոր Հովհաննես Ղուկասյանը՝ 1 մլն 110 հազ. 644 դրամ աշխատավարձով: Նախորդ տարվա նրա աշխատավարձը եղել է 1 մլն 106 հազ. 394 դրամ:
Ամեն ամիս 1 մլն 74 հազ. 793 դրամ աշխատավարձ են ստանում վերաքննիչ քրեական դատարանի դատավորներ Եվա Դարբինյանն ու Ռազմիկ Ազարյանը: 2010-ի համեմատ Ե. Դարբինյանի աշխատավարձն ավելացել է 500 դրամով, իսկ Ռ. Ազարյանինը 4500 դրամով նվազել է:
Վերաքննիչ քրեական դատարանի նախագահ Տիգրան Սահակյանը ստանում է 1 մլն 59 հազ. 428 դրամ աշխատավարձ:
Վերաքննիչ քաղաքացիական դատարանի դատավոր Նոյեմ Հովսեփյանի ամսական աշխատավարձը կազմում է 1 մլն 13 հազ. 212 դրամ, իսկ վարչական վերաքննիչ դատարանի դատավոր Լարիսա Սոսյանինը՝ 1 մլն 8 հազ. 212 դրամ: Վերջինս այս տարի է հայտնվել «միլիոնատեր» դատավորների ցուցակում: Նախորդ տարի Լ. Սոսյանը ստացել է ամսական 985 հազ. 518 դրամ աշխատավարձ:
Համեմատության համար նշենք, որ ՀՀ նախագահի աշխատավարձը կազմում է 400.000 դրամ, իսկ ԱԺ նախագահինը եւ վարչապետինը՝ 340.000-ական դրամ:
Նույն «Էյ Փի Էս Սի»-ի հարցումների համաձայն՝ Հայաստանում քաղաքացիների 46 տոկոսի ամսական ընտանեկան եկամուտը 40-130 հազ. դրամ է: Միայն 3.6 տոկոսի մոտ է այն գերազանցում է 421 հազ. դրամը, որոնց մեջ, փաստորեն, մտնում են նաեւ դատավորները:
Մեկնաբանություններ (2)
Մեկնաբանել