Այսօր Ջավախքի Գանձա գյուղում Վահան Տերյանի տուն-թանգարանում նշեցին Տերյանի ծնունդը՝ վերստին արժևորելով և արժանին մատուցելով բանաստեղծին:

Ջավախքի հեռավոր Գանձա գյուղում օրը տոնական էր ու մարդաշատ: Փետրվարի 9-ին է ծնվել հայ մեծանուն բանաստեղծ Վահան Տերյանը՝ քահանա Սուքիաս Տեր- Գրիգորյանի բազմանդամ ընտանիքում:

Նինոծմինդայի և շրջակա գյուղերի հոգևոր հովիվ Տեր Արմաշ քահանա Պողոսյանն ու Ախալքալաքի և շրջակա գյուղերի հոգևոր հովիվ Տեր Տաթև քահանա Մարուքյանը Տերյանի բնակարանում կատարեցին օրհնության կարգ և ներկաներին հորդորեցին ինչ էլ երբեք չմոռանան և հիշեն բանաստեղծին և ըստ արժանվույն գնահատեն նրա գրական վաստակը:

Այնուհետև տերյանասերները Տերյանի թանգարանում մասնակիցը եղան տոնական օրվա գրական հատվածին: Դպրոցահասակ երեխաները հանդիսատեսի դատին ներկայացրին Տերյանի բանաստեղծություններից մի գեղեցիկ ծաղկաքաղ: Այս մասին հայտնում է Ջավախքի ընդհանուր առաջնորդական փոխանորդության մամլո դիվանը: