Այսօր տեղի է ունեցել ՀՀ տարածքային կառավարման նախարարին կից կոլեգիայի  նիստը, որը վարել է ՀՀ փոխվարչապետ, տարածքային կառավարման նախարար Արմեն Գեւորգյանը: Մինչեւ օրակարգային հարցերին անցնելը` փոխվարչապետը կոլեգիայի անդամներին տեղեկացրել է, որ   հունվարի 31-ին ՀՀ վարչապետի նախագահությամբ կայացած Հայաստանի սոցիալական ներդրումների հիմնադրամի (ՀՍՆՀ)  հոգաբարձուների  խորհրդի  հերթական նիստում որոշում է կայացվել  ՀՍՆՀ-ն որպես Տարածքային զարգացման հիմնադրամ վերակազմակերպելու գործընթացն սկսելու մասին:  Ակնկալվում է, որ մինչեւ տարեվերջ կմշակվեն ու կընդունվեն բոլոր անհրաժեշտ փաստաթղթերը, եւ 2015 թվականից հիմնադրամն արդեն կսկսի իր գործունեությունը` նոր  մոտեցումներով եւ գործիքակազմով:

Ինչպես նշված է նախարարության հաղորդագրության մեջ, փոխվարչապետը տեղեկացրել է, որ զուգահեռաբար Համաշխարհային բանկի հետ քննարկվելու են հիմնադրամի նոր ծրագրի մանրամասները, որն ակնկալվում է  հաստատել մինչեւ տարեվերջ: Նա հույս է հայտնել, որ Տարածքային զարգացման հիմնադրամը կարեւոր դեր  կունենա համայնքների զարգացմանը նպաստելու աշխատանքներում: