«Ժառանգություն» խմբակցության պատգամավոր Արմեն Մարտիրոսյանը, «Առավոտին» հայտնելով իր վերաբերմունքը կոալիցիայի եւ խորհրդարանական ընդդիմության միջեւ երկխոսություն ծավալելու ԵԽԽՎ համազեկուցողի կոչի վերաբերյալ, ասել է. «Շատ նորմալ եմ վերաբերվում: Աքսել Ֆիշերը՝ որպես եվրոպական քաղաքականության ներկայացուցիչ, շատ լավ հասկանում է, որ իրական քաղաքական ուժերը, որպես կանոն, ներկայացված են լինում խորհրդարանում: Որքան էլ ընտրությունները կեղծվեն, այնուամենայնիվ, որոշակի հեղինակություն ունեցող ուժերը ներկայացված լինում են: Իր համար ակնհայտ է, որ «Ժառանգությունը» եւ ՀՅԴ-ն՝ որպես խորհրդարանական ընդդիմության ներկայացուցիչներ, բնականաբար, ունեն իրենց կշիռը եւ ազդեցությունը հասարակության մեջ, ուստի նաեւ հենց այդ ուժերի հետ է անհրաժեշտ, որ իշխանությունը փորձի երկխոսել»: