Արփինե Մինասյան

«Կառավարությունը պետբյուջեից գումար էր փոխանցել Սեւանի Նալբանդյան 36 հասցեի շենքի բնակիչներին: Նրանցից երկուսը դուրս են մնացել ծրագրից, երկուսը` չեն կնքել պայմանագրերը, 12-ը` կնքել եւ ստացել են գումարը: Քանի որ այդ գումարն ամբողջությամբ չի բավականացնում բնակարաններ գնելուն, փոխվարչապետ Արմեն Գեւորգյանի հետ պայամանավորվել ենք, որ օգնության կարգով բնակիչներին լրացուցիչ գումարներ տրամադրենք, որպեսզի կարողանանան բնակարաններ գնել»,- տեղեկացրեց Սեւանի քաղաքապետ Ռուդիկ Ղուկասյանը փետրվարի 18-ին Սեւանի ավագանու 2014թ.-ի անդրանիկ նիստի ժամանակ:

Խոսքը վերաբերում է Սեւանի Նալբանդյան 36 հասցեի 4-րդ կարգի վթարային շենքի բնակիչներին: 2013թ. օգոստոսի 1-ին նրանք հավաքվելով Կառավարություն շենքի մոտ` իրենց բնակարանների դիմաց փոխհատուցում էին պահանջում: Կառավարությունը 2012թ. նոյեմբերի 22-ի 1520-Ա որոշմամբ վթարային շենքում բնակվող 14 ընտանիքներին փոխհատուցում տրամադրելու համար հատկացրել էր 57 մլն 300 հազար դրամ:

«Կառավարությունը չի կարող ամբողջությամբ վճարել նրանց բնակարանների համար: Արմեն Գեւորգյանի հետ պայմանավորվածության արդյունքում կաշխատենք այս տարվա ընթացքում այդ գումարները տալ: Հետո Կառավարությունն այդ գումարները կփոխհատուցի մեզ»,- հայտարարեց Ղուկասյանը` սպասելով ավագանու անդամների քվեարկությանը: Ավագանու 15 անդամներից ներկա 12-ը միաձայն կողմ քվեարկեց որոշմանը: 

Նիստի օրակարգն ընդգրկում էր 7 հարց: Առաջինը վերաբերում էր համայնքի` 2013թ. բյուջեի կատարման մասին հաշվետվությանը, որի մասին զեկուցեց քաղաքապետարանի ֆինանսատնտեսագիտական բաժնի պետ Էդիկ Ղազարյանը: Վերջինս ներկայացրեց համայնքի 2013թ. տարեկան բյուջեի կատարման ցուցանիշները: «Համայնքի 2013թ. տարեկան բյուջեի եկամուտների պլանը կատարվել է 77,5%-ով, 574,7 մլն դրամ ճշտված պլանային եկամուտների դիմաց հավաքագրած եւ պետական բյուջեից հատկացված դոտացիան կազմել է 445,8 մլն դրամ, թերակատարումը կազմել է 128,9 մլն դրամ, վարչական բյուջեի գծով 17,2 մլն դրամ, ֆոնդային բյուջեի մասով` 111,7 մլն դրամ»:

Ըստ Ղազարյանի` 2012թ. նույն ժամանակահատվածի համեմատ համայնքի բյուջեն գերակատարվել է 18,9 %-ով կամ ավել եկամուտները կազմել են 71 մլն դրամ: 2013թ.-ի տարեկան բյուջեի վարչական մասի պլանը փաստացի կատարվել է 427,1 մլն դրամով, 2012թ.-ի համեմատությամբ ավել եկամուտները կազմել են 67,5 մլն դրամ: Էդիկ Ղազարյանի խոսքերով` բոլոր հարկատեսակների` հողի, գույքահարկի, տեղական ու պետական տուրքերի գծով առկա է գերակատարում: Համայնքի ֆոնդային բյուջեի եկամուտները փաստացի կազմում են 18,7 մլն դրամ: Վարչական բյուջեում սեփական եկամուտները կատարվել են 86,3 %-ով: Բյուջեն թերակատարվել է 19 մլն դրամի չափով, որը պայմանավորված է «Սեւան ազգային պարկ» ՊՈԱԿ-ի` Սեւանի քաղաքապետարանին ունեցած հողի վարձավճարը չփոխանցելով: Քաղաքապետը տեղեկացրեց, որ կառավարությանն առաջարկել են` կամ իրենց բազայից հանել «Սեւան ազգային պարկ» ՊՈԱԿ-ը, կամ` ստիպել, որ կատարի հարկային պարտավորությունները:

2013թ. բյուջեի ծախսերը հետեւյալ պատկերն ունեն. վարչական բյուջեի ծախսերը փաստացի կազմել են 427,3 մլն դրամ, թերակատարումը` 17,6 մլն դրամ: Բյուջեի ֆոնդային մասի ծախսերը փաստացի կազմել են 71.7 մլն դրամ: Ֆոնդային բյուջեի ծախսերի կատարումը ապահովվել է վարչական բյուջեի պահուստային ֆոնդից 53.4 մլն դրամի չափով ֆոնդային բյուջե փոխանցելու հաշվին: Նախորդ տարվա ընթացքում համայնքի ֆոնդային բյուջեից 32,5 մլն դրամ վճարվել է ասֆալտապատման համար, 1 մլն դրամով ձեռք է բերվել 23 հատ աղբարկղ, 24 մլն դրամի չափով կատարվել են փողոցային լուսավորության ցանցի աշխատանքներ, շուրջ 4 մլն դրամով Սեւանի «Երաժշտական դպրոց» ՀՈԱԿ-ը ձեռք է բերել երաժշտական նոր գործիքներ: Սեւանի քաղաքային զբոսայգու կառուցման համար բյուջետային, արտաբյուջետային, պետական բյուջեներից եւ «Քաունթերփարթ ինթերնեյշնլ» կազմակերպության հայաստանյան ներկայացուցչության միջոցներով իրականացվել է 39,5 մլն դրամի աշխատանք: Այս պահին զբոսայգու կառուցման աշխատանքները դադարեցված են. պատճառը եղանակային պայմաններն են:

Ավագանին միաձայն կողմ քվեարկեց համայնքի 2014թ.-ի բյուջեում փոփոխություններ կատարելու թույլտվությանը, տեղական տուրքերի, վճարների տեսակները եւ դրույքաչափերը հաստատելուն:

Օրակարգային էր նաեւ Սեւանի «Թիվ 4 Գալիք» մսուր-մանկապարտեզ ՀՈԱԿ-ի ծնողական վճարների փոփոխության մասին հարցը: Մանկապարտեզի տնօրեն Սվետա Կարապետյանի` վարձավճարը 2000 դրամով բարձրացնելու առաջարկը ավագանու անդամներից մի քանիսի մոտ մտավախություն ծնեց, որ շատ ծնողներ իրենց երեխաներին կտեղափոխեն համայնքի այլ մանկապարտեզներ: Տնօրենը եւ քաղաքապետը պատասխանեցին, որ այդ քայլով ցանկանում են ե’ւ մանկապարտեզը բեռնաթափել, ե’ւ խուսափել հաստիքացուցակի կրճատումից: Մինչ քվեարկությունը ներկաները համաձայնության եկան, որ եթե երեխաների թիվը չնվազի, այնուամենայնիվ կրճատում անելու են: Ավագանին որոշեց այսուհետ  «Թիվ 4 Գալիք» մսուր-մանկապարտեզի 5000 դրամ վարձավճարի փոխարեն սահմանել ամսական 7.000 դրամ:

Հաստատվեցին նաեւ Սեւանի քաղաքապետարանի աշխատակազմի պաշտոնական դրույքաչափերը, ինչպես նաեւ Սեւան համայնքի ավագանու 2013թ. դեկտեմբերի 23-ի «Նախադպրոցական եւ արտադպրոցական ՀՈԱԿ-ների աշխատակիցների, խմբերի եւ երեխաների թվաքանակի վերաբերյալ» թիվ 59-Ա որոշման մեջ կատարված փոփոխությունները: Ավագանին որոշեց զիջել նաեւ մի քանի քաղաքացիների հողի, գույքահարկի ու այլ հարկատեսակներից առաջացած տույժ ու տուգանքները: Քաղաքապետ Ղուկասյանը հայտարարեց. «Թող իրենց հասանելիք գումարները վճարեն, տույժ ու տուգանքները կզիջվեն»: Ավագանին առանց դեմ ու ձեռնպահի, որոշեց զիջել դրանք: