ՀՀ կառավարության կողմից 22 աշխատանքային խմբեր են ստեղծվել, որոնք անմիջական շփումների մեջ են գտնվում ինչպես Եվրասիական հանձնաժողովի աշխատանքային խմբի, այնպես էլ Ռուսաստանի, Ղազախստանի, Բելառուսի մասնագետների հետ: Նրանք մի կողմից ուսումնասիրում են ՀՀ պատրաստվածության աստիճանը Մաքսային միությանը անդամակցելու հարցում, մյուս կողմից օգնում են օրենքների նախապատրաստման հարցում՝ անցումը սահում կատարելու համար: Այս մասին ԱԺ-կառավարություն հարցուպատասխանի ժամանակ ասաց ՀՀ վարչապետ Տիգրան Սարգսյանը, պատասխանելով պատգամավոր Ռուզաննա Մուրադյանի հարցին, թե ինչ է քննարկվել ՌԴ վարչապետի հետ վերջին հանդիպման ժամանակ:

Վարչապետի խոսքերով՝ Եվրասիական հանձնաժողովի մասնագետները առաջիկայում կժամանեն Հայաստան, որպեսզի հանդիպումներ ունենան մասնավոր հատվածի հետ եւ ներկայացնեն մաքսային գործող ռեժիմները եւ այն ամենը, ինչը սպասվում է Մաքսային միությանը անդամակցելուց հետո:

Հաջորդ պայմանավորվածությունը եղել է աշխատուժի ազատ տեղաշարժի վերաբերյալ: «Մենք պայմանավորվեցինք, որ մեր ճանապարհային քարտեզի երկու պայմանագիր, որոնց պետք է միանայինք այն բանից հետո, երբ պատրաստ կլինի Մաքսային միությանը եւ միասնական տնտեսական տարածքին անդամակցելու պայմանագիրը, մինչ այդ երկկողմանի կստորագրենք երկու այդ պայմանագրերը, որպեսզի մեր քաղաքացիների համար ստեղծվի ավելի բարենպաստ միգրացիոն միջավայր, որպեսզի նրանք չառնչվեն այն դժվարությունների հետ, որոնք հունվարի 1-ից առաջացել են Ռուսաստանի նոր միգրացիոն օրենսդրության ուժի մեջ մտնելով»,-ասաց Տիգրան Սարգսյանը: