«Ձեռքերդ հեռու հղիների գրպաններից» ֆեյսբուքյան նախաձեռնությունը տարածել է հաղորդագրություն, որն ամբողջությամբ ներկայացնում ենք ստորև.

«Հարգելի ընկերներ, հաշվի առնելով առողջապահության նախարարության վերջին հայտարարությունը, համաձայն որի, մարտի 1-ից առողջապահության ոլորտում մի շարք ծառայություններ, որոնք այժմ անվճար են, կդառնան վճարովի, կարևոր ենք համարում արտահերթ բողոքի ցույց կազմակերպելը Առողջապահության նախարարության շենքի առջև և բացատրություն պահանջելը այդ որոշման առնչությամբ: 

Այդ փոփոխությունների թվին են պատկանում պոլիկլինիկաներում այժմ իրականացվող անվճար բուժզննումները և հղիության ընթացքում առաջացած բարդություններից բուժումները:

Եվ եթե պոլիկլինիկաներում հետազոտություններն ու անալիզները կարժենան 500-ից 1000 դրամ, ինչն այդքան էլ մեծ գումար չէ, ապա հղիները հիվանդանոցային բուժման յուրաքանչյուր օրվա համար ստիպված կլինեն վճարել օրական 5000 դրամ:

Հասկանալի պատճառներով անընդունելի համարելով այս ամենը` կոչ ենք անում բոլորիդ վաղը՝ փետրվարի 28-ին` ժամը՝ 13:00-ին, լինել Առողջապահության նախարարության շենքի առջև՝ ոլորտի պատասխանատուներին ցույց տալու մեր դժգոհությունը սույն որոշման վերաբերյալ և պահանջելու կասեցնել այն: Խնդրում ենք հնարավորինս լայն շրջանակներում տարածեք տեղեկատվությունը:
Յուրաքանչյուրիս մասնակցությունը կարևոր է»: