Ալավերդիում ամենախնդրահարույցը հողի հարկի հավաքագրումն է եղել
Ալավերդու քաղաքապետ Արտավազդ Վարոսյանը փետրվարի 25-ին հանրային քննարկման ներկայացրեց համայնքի 2013թ.-ի բյուջեի կատարման տարեկան հաշվետվությունը: Բյուջեի վերահսկողությունն իրականացնող մարմնի` համայնքի ավագանու անդամներից ոչ մեկը գնահատական չտվեց համայնքային բյուջեի եկամուտների հավաքագրմանը, կատարված ծախսերի արդյունավետությանն ու որակին: Ավագանին իրավազոր լինելով բյուջետային ցանկացած գործողություն ստուգելուն` հաշվետվության հանրային քննարկմանը չէր ներկայացրել 2013թ.-ի բյուջեի աուդիտ ստուգումների արդյունքները: Ուղիղ մեկ ժամ ներկայացրած բյուջեի տարեկան հաշվետվության վերաբերյալ դահլիճում նստածները որեւէ հարց չուղղեցին քաղաքապետին: Այդուհանդերձ, քաղաքապետի հաշվետվությունը ծափահարություններով բավարար գնահատվեց:
Արտավազդ Վարոսյանի հաշվետվության առաջաբանից պարզվեց, որ ավագանու նիստով հաստատված 2013թ.-ի գործունեության հաշվետվությունը հանրությանը ներկայացվում է ոչ թե «Տեղական ինքնակառավարման մասին» ՀՀ օրենքի պահանջով, այլ ձեւավորված ավանդույթի համաձայն` իրենց հաջողությունները ներկայացնելու եւ քաղաքապետարանի աշխատանքների շուրջ մտքերի փոխանակման համար: Ցավոք, հաշվետվության շուրջ այդպես էլ մտքերի փոխանակում տեղի չունեցավ, թեեւ աշխատակարգով ելույթների համար 5 րոպե էր սահմանվել:
Արտավազդ Վարոսյանը 2013թ.-ը բյուջետային տեսակետից բարդ տարի համարեց: Ասաց, որ տարին սկսել են 407 մլն 900 հազար դրամ հաստատված բյուջեով, ավարտել են 436,3 մլն դրամ բյուջեով: Նշեց, որ նախապես հաստատված եւ տարեվերջին արձանագրված բյուջեի շեղումները պայմանավորված են տարվա կեսին նվազագույն աշխատավարձի բարձրացման խնդիրներով եւ էներգակիրների թանկացման համար նախատեսված փոխհատուցումներով: Հաշվետվությունից պարզվեց, որ Ալավերդու բյուջեի հիմնական եկամտի աղբյուրներ են հանդիսանում պետբյուջեից հատկացվող դոտացիան, բնապահպանական սուբվենցիաները, տեղական հարկերը եւ տուրքերը, ինչպես նաեւ դրամաշնորհներն ու փոխհատուցումները: Քաղաքապետը հայտնեց, որ բյուջեի սեփական հարկային եկամուտների մուտքերը կատարվել է 95,3%-ով:
Հարկավաքության գործում ամենախնդրահարույցը քաղաքապետը համարեց հողի հարկը, այն հավաքագրվել է 72,3%-ով: «Իհարկե, մենք կարող ենք բազմաթիվ օբյեկտիվ եւ սուբյեկտիվ պատճառներ թվարկել, որոնցից մեկն այն է, որ դեկտեմբերի 28-ին, վերջին աշխատանքային օրը, նախորդ տարվա վճարած 1,7 մլն դրամ հարկային հավաքագրած գումարները մուտքագրվել են հունվար ամսին եւ չեն արտացոլվել 2013թ.-ի կատարողականում»,- ասաց նա: Բանախոսը հարկավաքության թերացումների պատճառները փնտրեց հարկային վարչարարության մեջ: Թեեւ kառավարության որոշումով` մինչեւ 2008թ.-ը կուտակված հողի հարկի 60 մլն դրամի զիջումներին, այդուհանդերձ 2014թ.-ի հունվարի 1-ի դրությամբ Սանահին եւ Ակներ գյուղական թաղամասերում հողի հարկի 770 հազար դրամի ապառք է արձանագրվել:
Ըստ Ա. Վարոսյանի` 2013թ.-ը նշանավոր էր նաեւ նրանով, որ շնորհիվ Լոռու մարզպետի աջակցության, կառավարության որոշումով համայնքն ազատվել է 70 մլն դրամ վարկից: Ինչպես ներկայացրեց քաղաքապետը, 2013թ.-ին քաղաքապետարանի որեւէ ծախսային ծրագիր չի ձախողվել, հակառակը` ծախսային ծրագրերով արձանագրվել են տնտեսումներ: «Հաշվետու տարում հայտարարվել են նախահաշվային արժեքով ընդհանուր առմամբ 205 մլն 745 հազար դրամի գնումների մրցույթներ: Կնքված պայմանագրերի գումարը կազմում է 192 մլն 188 հազար դրամ, նախատեսված նախահաշվային գումարներից եղել է 12 մլն 869 հազար դրամ տնտեսում»,- հայտնեց Արտավազդ Վարոսյանը: Վերջինս անդրադարձավ նաեւ 2013թ.-ի ընթացքում Ալավերդի քաղաքում կատարված կապիտալ աշխատանքներին, որոնք իրականացվել են համայնքային բյուջեի միջոցներով, պետական սուբվենցիաներով եւ պետբյուջեից հատկացված լրացուցիչ գումարներով:
Նշեց, որ համայնքի բյուջեի ֆինանսավորմամբ 2013թ.-ին նորոգվել է քաղաքի Զորավար Անդրանիկ փողոցի 128 շենքի հարակից տարածքի հենապատը, քաղաքի փողոցներում կառուցվել են կանգառներ, նորոգվել է Թումանյան փողոցի անձրեւաջրերի համակարգը, կատարվել է փողոցների գծանշում, ճանապարհների ընթացիկ նորոգում, Ակներ թաղամասի ակումբի նորոգում: Նշված ծրագրերի ընդհանուր գումարը կազմել է 15,3 մլն դրամ: Անդրադառնալով բնապահպանական սուբվենցիաներով իրականացված ծրագրերին, Ա. Վարոսյանն անդրադարձավ Ս. Սարահարթ թաղամասում Գայի փողոցի կանաչապատմանը: Ասաց, որ ֆինանսական նույն աղբյուներով ձեռք են բերվել մեկ աղբատար մեքենա եւ բազմաֆունկցիոնալ ջրցան մեքենա, պլաստմասե աղբամաններ եւ այլն:
Ալավերդու քաղաքապետը կարեւորեց քաղաքապետարանի կոմունալ տնտեությունը գույքով համալրելու հարցը: Ասաց, որ ընթացիկ տարում նախատեսում են ձեռք բերել կոշտ կենցաղային թափոնների համար մեծ աղբամաններ: Այսուհանդերձ, քաղաքապետը չանրադարձավ այն խնդրին, որ թեեւ համայնքի բյուջեից աղբահանությանը արված մեծ հատկացումներին, քաղաքի թաղամասերի լանջերին ու Դեբեդ գետի ափերին մշտապես կենցաղային աղբ է լինում:
Մեկնաբանել