ՀՀ փոխվարչապետ, տարածքային կառավարման նախարար Արմեն Գեւորգյանի մոտ այսօր կայացած խորհրդակցության ընթացքում քննարկվեցին Գյումրի քաղաքի որոշ փողոցներում ստեղծված իրավիճակի հետ կապված հարցեր: Ինչպես նշված է Տարածքային կառավարման նախարարության հասարակայնության հետ կապերի բաժնի տարածած հաղորդագրության մեջ, խորհրդակցությանը մասնակցում էին Գյումրիի քաղաքապետը, Տարածքային կառավարման նախարարության Ջրային տնտեսության պետական կոմիտեի,  «Շիրակ-ջրմուղկոյուղի» ընկերության կառավարումն ստանձնած ընկերության, Գյումրիում ջրամատակարարման համակարգի վերանորոգման ծրագրի խորհրդատու եւ ծրագիրն իրականացնող  շինարարական  ընկերությունների ներկայացուցիչներ:

Փոխվարչապետին զեկուցվեց, որ ջրամատակարարման ցանցի վերանորոգման աշխատանքների եւ եղանակային  պայմանների  պատճառով դժվարանցանելի իրավիճակ է ստեղծվել քաղաքի մի շարք երկրորդային` հատկապես, գրունտային  ծածկով փողոցներում: Քաղաքապետը եւ ծրագրի  պատասխանատուները վստահեցրեցին, որ ներկայումս իրավիճակի կարգավորման ուղղությամբ  անհրաժեշտ  աշխատանքներ են իրականացվում:

Փոխվարչապետը  բոլոր կողմերին հորդորեց աշխատել համակարգված: Նա ծրագրի պատասխանատուներին առաջարկեց  աշխատանքները կազմակերպելիս հաշվի առնել ինչպես  քաղաքի  փողոցների կառուցապատման, այնպես էլ բնակլիմայական պայմանների  առանձնահատկությունները:Մասնավորապես, առաջարկվեց  աշխատանքներն ավարտել  մինչեւ հոկտեմբեր, որպեսզի հետագայում լրացուցիչ դժվարություններ չառաջանան բնակիչների համար:

Խորհրդակցության մասնակիցները միաժամանակ ընդգծեցին քաղաքի ջրամատակարարման ցանցի վերականգնման ծրագրի կարեւորությունը,  որը ենթադրում է  ցանցի ամբողջական  վերականգնում ինչպես կենտրոնական, այնպես էլ  երկրորդային փողոցներում: