![](/static/articles/03/29/39/l-VAVBj4mZfu.jpg)
Հնաբերդի դպրոցի տնօրենի ընտրությունները կրկին տապալվեցին
Երեկ Արարատի մարզի Հնաբերդ համայնքի միջնակարգ դպրոցում կրկին տնօրենի ընտրություն էր հայտարարված: Այս անգամ էլ այն տապալվեց, քանի որ դպրոցի կառավարման խորհրդի անդամները չներկայացան:
Հիշեցնենք, որ նմանատիպ իրավիճակ ստեղծվել էր նաեւ փետրվարի 26-ին: Ինչպես նախորդ, այնպես էլ այս անգամ տնօրենի ընտրության տապալման գործում իրենց ներդրումն ունեն Արարատի մարզպետարանի պատասխանատուները, քանի որ կառավարման խորհրդի նրանց ներկայացուցիչները եւս չեն ներկայանում նիստերին: Պատճառն այն է, որ պետական օղակներում ցանկանում են տնօրենի պաշտոնում տեսնել ներկայիս ժամանակավոր պաշտոնակատար Վարսիկ Եղիազարյանին, մինչդեռ այդ պաշտոնում ընտրվելու համար լուրջ հնարավորություններ ունի նախկին տնօրեն Անժելա Մեջլումյանը:
Խորհրդի անդամներից մեկը, ում անունն իր իսկ խնդրանքով չենք հրապարակում, նշեց, որ իրենց խնդրել են չմասնակցել ընտրություններին, ինքն էլ ստեղծված վիճակը չբարդացնելու համար ստիպված չի ներկայանում:
Հնաբերդի դպրոցում ստեղծված իրավիճակի մասին փորձեցինք պարզաբանում ստանալ Արարատի մարզպետարանի կրթության, մշակույթի եւ սպորտի վարչության պետ Անահիտ Հակոբյանից: Հարցը լսելուց հետո նա ասաց, որ այդ հարցով դիմենք փոխմարզպետ Իլյիչ Շադյանին, կամ կրթության բաժնի պետ Ալբերտ Մկրտչյանին: «Արձակուրդից նոր եմ վերադարձել, իրավիճակին չեմ տիրապետում: Դիմեք փոխմարզպետին թող պատասխանի»,- ասաց Անահիտ Հակոբյանը՝ հավելելով, որ ինքը եւս անհանգստացած է ստեղծված վիճակով:
Մեր փորձերը պարզաբանում ստանալ Իլյիչ Շադյանից ձախողվեցին: Նրա գործավարուհին սկզբում ասաց, որ փոխմարզպետն աշխատասենյակում չէ, մեկ էլ շտապ հարց առաջացավ, ու նա դուրս եկավ մարզպետարանից, իսկ Ալբերտ Մկրտչյանի հեռախոսազազանգերին պատասխանող չկար:
Հնաբերդի դպրոցի կառավարման խորհրդի նախագահ Զավեն Մեջլումյանը, ով Անժելա Մեջլումյանի ամուսինն է, ասաց, որ դպրոցում ստեղծված իրավիճակի մասին մանրամասն ներկայացնելու է կրթության եւ գիտության նախարար Արմեն Աշոտյանին: Իսկ թե դրանից հետո ինչ է լինելու, չկարողացավ ասել:
Մեկնաբանել