Մարտի 13-ին Շվեդիայում ՀՀ դեսպան Արտակ Ապիտոնյանը հանդիպում ունեցավ «Էրիքսոն» ընկերության կենտրոնակայանում ընկերության փոխնախագահ, կառավարության և արդյունա­բերության հետ հարաբերությունների գծով տնօրեն Ուլֆ Պերսոնի հետ։ Այս մասին հայտնում է ԱԳՆ մամլո ծառայությունը:

ՀՀ դեսպանին ներկայացվեց «Էրիքսոնի» գործունեությունը համաշխարհային տարբեր շուկաներում, հեռանկարային ծրագրերը, կազմակերպվեց ընկերության վերջին գիտական մշակումների ցուցադրություն։

Դեսպան Ապիտոնյանը և «Էրիքսոնի» փոխնախագահը քննարկեցին Հայաստանում ընկերության ծրագրերը, ինչպես նաև գործունեության ընդլայնման հեռանկարները։ Տեղի ունեցավ մտքերի փոխանակում հեռահաղորդակցության ոլորտի, ինչպես նաև հեռուստատեսության թվայնացման և էլեկտրոնային առողջապահության ոլորտներում ներդրումային հնարավորությունների վերաբերյալ։