Հաշմանդամների միջազգային օրը պետականորեն նշվում է նաեւ Ղարաբաղում: Այսօր այդ կապակցությամբ տարբեր միջոցառումներ կիրականացվեն ինչպես պետական մարմինների, այնպես էլ մասնավոր ընկերությունների կողմից: Ինչպես Հետքին տեղեկացրեցին ԼՂՀ սոցիալական ապահովության նախարարությունում, այսօր նախարարության աշխատակիցները այցելելու են հանրապետության 2 եւ ավելի հաշմանդամ երեխաներ ունեցող ընտանիքներին: Բացի այդ ընտանիքների պայմանների ուսումնասիրությունից, նրանք նաեւ օգնություն են ցուցաբերելու` ինչպես դրամական, այնպես էլ սննդամթերքի տեսքով: Նախարարության ընտանիքի եւ երեխաների հիմնահարցերի վարչության պետ Սամվել Դադայանը տեղեկացրեց, որ նման ընտանիքները Ղարաբաղում 12-ն են, որից 4-ը` Ստեփանակերտում, 2-ական` Մարտունու եւ Քաշաթաղի, 1-ական` Մարտակերտի, Ասկերանի, Հադրութի եւ Շուշիի շրջաններում: Այդ ընտանիքներում ընդգրկված են թվով 25 երեխաներ, որոնց էլ դրամական օգնության կարգով կտրամադրվի 50 հազարական դրամ: Այսօր` հաշմանդամների օրվա կապակցությամբ, արցախյան պատերազմի 1-ին կարգի 9 հաշմանդամներին վերջերս տրամադրված ձեռքի կառավարման մեքենաների բանալիների հետ կհանձնվի նաեւ նրանց վարորդական իրավունքի վկայականները: ԼՂՀ սոցապահովության նախարարության տվյալներով` հանրապետությունում ներկայումս հաշվառված է 10160 հաշմանդամ, այդ թվում` 530-ը մինչեւ 18 տարեկան երեխաներ են: Ընդհանուր թվի 55%-ը աշխատունակ տարիքի է (16-63): Հաշմանդամ կանայք կազմում են ընդհանուր թվի 40%-ը: