«Դեկտեմբերի սկզբներին Վաշինգտոնում տեղի կունենա «Հազարամյակի մարտահրավեր» կորպորացիայի խորհրդի նիստ, որի ժամանակ, ի թիվս այլ հարցերի, կքննարկվի նաև Հայաստանի հետ ծրագրերի իրականացման հարցը»,- այսօր լրագրողների հետ ճեպազրույցի ժամանակ ասաց Հայաստանի «Հազարամյակի մարտահրավեր» հիմնադրամ-Հայաստան ՊՌԱԿ-ի գործադիր տնօրեն Արա Հովսեփյանը՝ պատասխանելով այն հարցին, թե ինչ վիճակում են կորպորացիայից Հայաստան իրականացվող փոխանցումները: Սակայն Ա. Հովսեփյանը տեղյակ չէր, թե ի՞նչ ֆորմատով կքննարկվի հարցը, ինչքանո՞վ են հավանական կասեցումները: Արա Հովսեփյանի խոսքերով՝ մինչև սեպտեմբերի 30-ը իրենք կորպորացիայից արդեն ստացել են 20 մլն դոլար, որով իրականացվել է Արմավիր -Գյումրի ճանապարհահատվածի շինարարությունը, որը շուտով կհանձնվի շահագործման, 4 համայնքներում իրականացվել է ներտնտեսային ոռոգման ցանցի շինարարություն, կատարվել են ուսումնասիրություններ և նախագծային աշխատանքներ: Իսկ հոկտեմբեր-դեկտեմբեր եռամսյակի համար իրենք կորպորացիայից խնդրել են 4 մլն դոլար, որի փոխանցումն արդեն սկսվել է: