ՀՀ պաշտպանության նախարարությունում այսօր տեղի ունեցավ Հավաքական Անվտանգության Պայմանագրի Կազմակերպության անդամ-պետությունների պաշտպանության նախարարների Խորհրդի հերթական նիստը: Նիստին մասնակցում էին Բելառուսի, Ղազախստանի, Ղրղզստանի, Ռուսաստանի Դաշնության, Տաջիկստանի Հանրապետության, Ուզբեկստանի Հանրապետության պաշտպանության նախարարների գլխավորած պատվիրակությունները` նախագահությամբ ՀՀ պաշտպանության նախարար Սեյրան Օհանյանի: Այս մասին տեղեկացնում է Պաշտպանության նախարարության կայքէջը: ՀԱՊԿ անդամ-պետությունների` մասնավորապես Հայաստանի և Ռուսաստանի, Հայաստանի և Բելառուսի պաշտպանական գերատեսչությունների ղեկավարները ստորագրել են երկկողմ ռազմական փաստաթղթեր: Նիստի ընթացքում մտքեր են փոխանակվել ռազմական գերատեսչությունների` Կազմակերպության միջպետական համաձայնագրերի և Հավաքական անվտանգության խորհրդի որոշումների իրականացմանն ուղղված քայլերի, ՀԱՊԿ կոալիցիոն բանակաշինության մեխանիզմների կատարելագործման, ՀԱՊԿ անդամ-պետությունների միացյալ ՀՕՊ համակարգի զարգացման հեռանկարների, ՀԱՊԿ Կենտրոնական Ասիայի տարածաշրջանում արագ արձագանքման Հավաքական ուժերի կատարելագործման վերաբերյալ: Նիստից հետո տեղի ունեցավ մամլո ասուլիս` ՀԱՊԿ անդամ-պետությունների պաշտպանության նախարարների մասնակցությամբ: Պատասխանելով լրագրողի հարցին՝ Ս. Օհանյանը նշեց, որ լիագումար նիստում քննարկվել են արդիական, կոնցեպտուալ և գործնական բնույթի հարցեր. «Ըստ օրակարգի՝ անդրադարձ է կատարվել նաև այնպիսի հարցերի, ինչպիսիք են կառույցի զարգացման ռազմավարությունը` ժամանակակից իրողություններին համահունչ: Որոշում է ընդունվել համատեղ միջոցառումների հեռանկարային պլանավորման, օպերատիվ-մարտական պատրաստության, հավաքական անվտանգության համակարգի ուժերի և միջոցների` կառույցի շրջանակներում գործունեությունը պլանային հիմքի վրա դնելու վերաբերյալ»,- ասաց նախարարը: