Այսօր «Տեսակետ» ակումբում Շախմատի 38-րդ օլիմպիադայի չեմպիոնները հանդիպեցին լրագրողների հետ: Շախմատիստները փորձեցին բացահայտել հաղթանակի գաղտնիքը: Հավաքականի մարզիչ Արշակ Պետրոսյանը գտնում է, որ հաջողության բանալին տղաների՝ ուժեղ շախմատիստներ լինելու մեջ է, նաեւ՝ թիմային ոգի ունենալը. «Տարբեր թիմերում խնդիր կա, թե որ շախմատիստն է մրցաշարում հանդես գալու սպիտակներով, քանի որ սպիտակներով խաղալը ավելի հարմար է, իսկ մեր թիմում սեւերով կամ սպիտակներով խաղալու խնդիր չկա»,- վստահեցնում է Ա. Պետրոսյանը: Մարզիչը կարեւորեց պետական աջակցությունը, որը թույլ է տալիս թիմին գոյատեւել որպես մեկ օրգանիզմ: Լեւոն Արոնյանը գտնում է, որ թիմը միշտ էլ ուժեղ էր, բայց Արշակ Պետրոսյանի ղեկավարությունը նոր լիցք տվեց իրենց: Ըստ Արոնյանի` թիմը լարված էր Իսրայելի հետ խաղում, որովհետեւ գիտեին, որ այդ խաղի հաղթական ելքը իրենց կդարձնի օլիմպիական չեմպիոն: Տիգրան Պետրոսյանն էլ կրկնակի պատասխանատվություն էր զգում, քանի որ հանդես էր գալիս Կարեն Ասրյանի փոխարեն. «Ես առաջին անգամ էի հանդես գալիս օլիմպիադայում, սակայն թիմը բոլոր ջանքերը գործադրեց, որ ես մերվեմ»: Իսկ թե ինչո՞վ կզբաղվեին շախմատիստները, եթե չլիներ շախմատը, պատասխանն այսպիսին է՝ Գաբրիելը ֆուտբոլով կզբաղվեր, Վլադիմիրը` երաժշտությամբ, Արշակ Պետրոսյանը համալսարանում կդասավանդեր, Լեւոնը շաշկի կխաղար: Շախմատիստները վստահեցնում են, որ երրորդ անգամ չեմպիոն դառնալու հավանականություն կա, եթե թիմը նույն տեմպերով հանդես գա: Այն հարցին, թե դեպքեր եղե՞լ են, որ թիմից մեկը խաղի ժամանակ օգնի մյուսին ժեստերով, Լ. Արոնյանը պատասխանեց, որ դա իրենց գաղտնիքն է: Ֆինանսական պարգեւներ Դրեզդենում շախմատիստները չեն ստացել, միայն` ոսկե մեդալներ: Շախմատիստները հույս ունեն, որ մեկ շաբաթից հետո հնարավոր կլինի հանգստանալ: