«Տնտեսական ճգնաժամը շատ լուրջ է, սակայն այն դեռ այդքան ուժեղ չի զգացվում Հայաստանում, ինչքան Ամերիկայում, Եվրոպայում: Հայաստանում այն կզգացվի ամենավերջինը, քանի որ տնտեսության մեջ միշտ էլ առաջատարներն են տուժում, հետո այն հասնում է «աութսայդերներին»: Եվ հետո էլ՝ առաջատարները առաջինն են դուրս գալիս ճգնաժամից, իսկ «աութսայդերները» հետևում են նրանց»,- այսօր «Դե Ֆակտո» ակումբում լրագրողների հետ հանդիպման ժամանակ կարծիք հայտնեց «Միկա հոլդինգ» ավիաընկերության նախագահ Միկա Բաղդասարովը: Ըստ նրա՝ Հայաստանի վրա տնտեսական ճգնաժամն այդքան մեծ ազդեցություն չունի, քանի որ հայ գործարարները չունեն բաժնետոսմսեր և, հետեւաբար, դրանց գների կտրուկ անկումը չի կարող անդրադառնալ հայ գործարարների վրա: Բաղդասարովի կանխատեսմամբ՝ Հայաստանում տնտեսական ճգնաժամի ազդեցությունը շատ ավելի տեսանելի կլինի ճգնաժամի հաջորդ փուլերում, հաջորդ տարվա մարտ ամսին, երբ դժվար կլինի իրացնել արտադրանքը այն ծավալով, ինչ 2008-ին էր: Ինչ վերաբերում է նրան, որ Հայաստանը կարող է օգուտներ քաղել ճգնաժամից՝ ներդրումների համար հարմար շուկա դառնալով, Միկա Բաղդասարովը արձագանքեց. «Ես շփվել եմ շատ գործարարների հետ, և նրանցից ոչ մեկը ցանկություն չի հայտնել գալ Հայաստանում աշխատել, ինչու՞ գան Հայաստան, եթե Ռուսաստանում և Վրաստանում, եվրոպական երկրներում ավելի շահավետ է ներդնելը, նրանք իջեցնում են հարկերը, իսկ մեզ մոտ հարկը, օրինակ, թաքցնում են տոմսի գնի մեջ,- ասաց նա: Ըստ Բաղդասարովի՝ այսօր մենք կարող էինք հարկերը նվազեցնել և գրավել մեր սփյուռքի ուշադրությունը, որը արտասահմանում տանջվում է ճգնաժամի պատճառով: Մ. Բաղդասարովին չի բավարում նաև մեր բանկերի վիճակը. «Կարելի է ասել, որ մեր բանկերը լավ վիճակում են, բայց ու՞մ հետ համեմատության մեջ: Եթե Վրաստանի հետ համեմատենք, ապա այո, իսկ եթե եվրոպական բանկերի հետ համեմատենք, ապա ոչ մի լավ բան չկա, քանի որ մեր բանկերի կապիտալը 25 մլն է, իսկ այնտեղ՝ 25մլրդ»: «Արդյոք Մ. Բաղդասարովը փորձու՞մ է հակաճգնաժամային քայլեր առաջակել» հարցին նա պատասխանեց՝ ոչ, անիմաստ է: