«Հետքը» վերջերս անդրադարձել էր մուտքի վիզաների ուշացման պատճառով սփյուռքահայ ուսանողներից տուգանք գանձելու խնդրին: Բանն այն է, որ «Օտարերկրացիների մասին» ՀՀ օրենքը սահմանում է Հայաստանում օտարերկրացիների կացության ձևերը: Համաձայն Օրենքի 14-րդ հոդվածի 3-րդ մասի, Հայաստանի Հանրապետությունում օտարերկրացիներին կացության կարգավիճակ տալու համար գանձվում է պետական տուրք՝ «Պետական տուրքի մասին» Հայաստանի Հանրապետության օրենքով սահմանված չափով: Ուսանողների կեցության կարգավիճակով, սակայն, զբաղվում են բուհերը: Մուտքի վիզան տրամադրող ոստիկանության անձնագրերի եւ վիզաների վարչության` Օվիրի և պետական բուհերի միջև համաձայնություն է եղել, որպեսզի այդ գումարը գանձվի սփյուռքահայ ուսանողների վճարած ուսման վարձերից, քանի որ նրանք գրեթե կրկնակի շատ են վճարում, քան ՀՀ քաղաքացիները: Ժամանակավոր կացության կարգավիճակը ուսանողներին տրվում է մեկ տարի ժամկետով: Ժամկետը լրանալուց 30 օր առաջ հնարավորություն է տրվում այն ևս մեկ տարով երկարաձգել: Ընդունված կարգի համաձայն, վիզայի նորացման համար պահանջվող փաստաթղթերը ԲՈՒՀ-երի համապատասխան բաժիններն են ներկայացնում ուսումնական տարվա հենց սկզբում: «Բոլոր բուհերը չեն կատարել իրենց պարտականությունները, չեն վճարել պետական տուրքը և օրենքով նախատեսված ժամկետում չեն դիմել ՕՎԻՐ»,- այսօր «Ուրբաթ» ակումբում հայտարարեցին ՀՅԴ Նիկոլ Աղբալյան ուսանողական միության անդամներ Անի Ազատգոլը, Մհեր Հակոբյանը և Հայկ Ասատրյանը: Այս ուսումնական տարում փաստաթղթերի ներկայացման ժամկետը սահմանվել է մինչև օգօստոսի 20-ը, մինչդեռ ամեն տարի ժամկետը սեպտեմբերի 15-ն էր: Այդ մասին տեղյակ չեն եղել ուսանողները, քանի որ արձակուրդային շրջան է եղել, ուսանողների մեծ մասը գտնվել է իրենց երկրներում: Երբ ուսանողները ուսումնական տարվա սկզբին վերադարձել են դասընթացների, պարզվել է, որ պետք է տուգանքներ մուծեն` 50-100 000 դրամ, քանի որ ուշացրել են վիզաների թարմացումը: «Ոստիկանը գալիս է մի սփյուռքահայ ուսանողուհու տուն, ասում է, որ պետք է տուգանքը վճարի, այլապես իրեն դեպորտ կանեն»,-պատմում է Անի Ազատգոլը: Ուսանողները տուգանման որոշման մասին և այդ մասին իրազեկելու ձևերի վերաբերյալ բողոքել են ՀՀ ԿԳ նախարարությանը, որտեղից ստացել են պատասխան, թե հավաստագրերի ուշացումը տեխնիկական բնույթ է կրում, և ԲՈՒՀ-երը նախարարության կողմից տեղեկացվել են, որպեսզի իրենք մուծեն տուգանքները, և ոչ թե ուսանողները: Այդուհանդերձ, բանախոսները փաստում են, որ երեկվա դրությամբ դեռ շարունակում են այցելությունները սփյուռքահայ ուսանողների տներ: ԲՈՒՀ-երը չեն մուծում այդ տուգանքները, չնայած իրենք են եղել այդ ամենի մեղավորը: Ըստ Մհեր Հակոբյանի` այս խնդիրն ունի երկու կողմ` իրավական և բարոյական: Իրավակամ մասին անդրադառնալով` Մհեր Հակոբյանը նշեց, որ Օվիրը դիմել է ոստիկանությանը, որպեսզի վերջինս զբաղվի այդ հարցերով: «Ոստիկանները մինչև երեկ գնում էին ուսանողների տները, հայտնում են, որ չեն վճարում և սպառնում են նրանց արտաքսել Հայաստանից»,-ասում է Հայկ Ասատրյանը: «Ոստիկանությունը նման իրավունք չունի: Օտրաերկրացիների մասին օրենքը խախտելու համար արտաքսելու իրավունք ունի միայն դատարանը, ոստիկանությունը կարող է միայն գործ հարուցել»,-շարունակում է Մհեր Հակոբյանը` նշելով, որ բարոյական իմաստով «սա սպառնալիք է հնչում սփյուռքահայ ուսանողներին իրենց կրթությունը հայրենիքում շարունակելու համար»: