Քիչ առաջ «Եռաբլուր» պանթեոնում եռօրյա նախազգուշական հացադուլ սկսեցին ազատամարտիկներ Արմեն Մանուկյանը, Գագիկ Բեկջանյանը, Վարդան Մալխասյանը եւ Մերուժան Հարությունյանը: Րոպեներ անց նրանց միացավ նաեւ ազատամարտիկ Սուրեն Մարտիրոսյանը: Նրանք իշխանություններից պահանջում են «Ազատագրված տարածքներից չզիջել ոչ մի թիզ հող», իսկ «Արցախը ճանաչել Հայաստանի անբաժանելի մաս»: «Պահանջում ենք նաեւ անհապաղ ազատ արձակել բոլոր քաղբանտարկյալներին»,- ասում է Մերուժան Հարությունյան: Նա արցախյան գոյամարտի ժամանակ մարտնչել է «Հատուկ գնդի» կազմում: Վերջինիս խոսքերով` ամենեւին պատահական չէ, «որ մեր իշխանությունները հիմնականում Արցախի հերոսներին այսօր պահում են անազատության մեջ, իսկ իրենք Ղարաբաղի հարց են քննարկում»: «Իհարկե, դա ծրագրված է: Տղաներին նստացրել են սուտ ցուցմունքներով: Ի՞նչ է, իր (Սերժ Սարգսյանի - «Հետք») իմիջը, լեգիտիմությունն ավելի՞ կարեւոր է, քան Հայաստանի Հանրապետությունը: Պարզապես խորհորդ կտամ բոլոր իշխանական աթոռներին նստածներին մի քիչ մտածել: Վաղը կորող է ուշ լինել»,- ավելացնում է Արմեն Մանուկյանը: Նա թեեւ մանկուց 2-րդ կարգի հաշմանդամ է, բայց ակտիվորեն մասնակցել է Արցախի ազատագրմանը` ընդգրկվելով «Արծիվ 13» ջոկատում: Նախատեսվում է, որ օրվա ընթացքում հացադուլավորները կլինեն տասը: Ակցիայի մասին տեղեկացվել է Մարդու իրավունքների պաշտպանի գրասենյակը, Առողջապահության նախարարությունը եւ «Կարմիր խաչ» միջազգային կազմակերպությունը: Ազատամարտիկները նշում են, որ եթե իշխանությունները դարձյալ «տեղից չշարժվեն», պատրաստ են հայտարարել անժամկետ հացադուլ: