Շիրակի մարզի Ողջի գյուղի նորընտիր համայնքի ղեկավար Սարգիս Ավագյանին պաշտոնանկ անելու նպատակով մի խումբ գյուղացիներ, գյուղապետի նախկին թեկնածու Վարդան Պետրոսյանի գլխավորությամբ, սկսել են ստորագրահավաք նրա դեմ: Գյուղացիների ասելով՝ 17 տարի շարունակ գյուղապետի աթոռը զբաղեցրած այս անձը վերընտրվել է անօրինական ձևով. քվեարկությանը մասնակցել են գյուղում գրանցում չունեցող մարդիկ, որպես ընտրակաշառք Ավագյանը գյուղացիներին աթար է բաժանել, ավելին՝ գյուղապետը խլել է իրենց հողատարածքները, յուրացրել գյուղին հատկացված սուբսիդիան, թալանել ու վաճառել է գյուղի տեխնիկան, գյուղացիներին տեղեկանքներ տրամադրելիս նրանց ամենավերջին ձևով հայհոյել է: Վարդան Պետրոսյանի կնոջ` Ողջիի դպրոցի տնօրեն Գոհար Պետրոսյանի ներկայացնելով՝ գյուղապետը ՏԻՄ ընտրություններից առաջ իր ամուսնու դեմ «գործ է սարքել», որպեսզի «նրան խաղից հանի», չթույլատրի գյուղապետի պաշտոնի համար իր թեկնածությունը առաջադրել: Չնայած դրան՝ Վարդան Պետրոսյանն ընդամենը ութ ձայնով է Սարգիս Ավագյանին զիջել: Ի դեպ, տիկինն այս ամենի մասին մեզ դժգոհեց Սարգիս Ավագյանի ներկայությամբ` մերթընդմերթ նրա հետ վիճաբանության մեջ մտնելով: Գոհար Պետրոսյանի ասելով՝ դատախազությունն իր ամուսնու դեմ գործ է հարուցել առանց համապատասխան հիմքեր, վկաներ, ապացույցներ ունենալու, ավելին՝ խախտելով օրենքը՝ քննիչ Ռուբեն Վարձյանն իր անչափահաս որդուն հարկադրել է ցուցմունք տալ առանց ծնողների ներկայության: Պատճառը, ըստ տիկնոջ, եղել է այն, որ իբրև թե իր ամուսինը խփել է գյուղապետի դեմքին, երեխան էլ ներկա է եղել: «Եթե խփել էր ու դեմքդ վնասվել էր, նույն վայրկյանին ոստիկանություն կանչեիր, ոչ թե հինգ-վեց ժամ անց, ու անմեղ մարդու դեմ 316 հոդվածի 1-ին մասով` իշխանության ներկայացուցչի նկատմամբ բռնություն կիրառելու մեղադրանքով գործ հարուցել տայիր, ի՞նչ է՝ կրակն ընկա՞վ, որ թեկնածություն է դրել, քննիչ Վարձյանը թող բարի լիներ պարզաբաներ, գուցե էդ հինգ-վեց ժամվա ընթացքում գյուղապետը մի ուրիշի հետ էր վիճել, և եթե դեմքին հարվածի հետքեր կային, միգուցե դա երրորդ անձի ձեռքի գո՞րծ էր: Գյուղում կռիվ էլ, գողություն էլ, ինչ ասես լինում է, սակայն ոչ մի շշուկ, ոչ մի ձայն, իսկ հիմա գյուղապետի ընկեր ոստիկանները կայծակնային արագությամբ արձագանքեցին»,- գյուղապետին հանդիմանում էր Գոհար Պետրոսյանը: Գյուղապետն էլ տեղից բացականչում էր. «Հերիք է սուտ խոսես, ես ոստիկաններին չեմ հրավիրել, նրանք ինքնակամ նույն մոմենտին պատահաբար իմ տուն են եկել»: Իսկ հողերը գյուղացիներից խլելու ու գյուղին հասանելիք սուբսիդիան յուրացնելու մեղադրանքներին ի պատասխան՝ գյուղապետը արդարացավ, որ նրանք հողի հարկի հսկա պարտք ունեն, իսկ սուբսիդիան մեկ առ մեկ բոլորին բաժանվել է` բացառությամբ մեկի, ով դարձյալ հսկա պարտքեր ուներ: Գյուղացիները նաև բողոքեցին, որ գյուղապետարանի շենքը «տարին տասներկու ամիս փակ է», իսկ գյուղապետը փաստացի բնակվում է Գյումրիում: Մենք պարզեցինք, որ, իրոք, գյուղապետարանի շենքը էլեկտրաէներգիա չուներ, սենյակներում սառնամանիք էր: Իսկ գյուղապետն արդարացավ, որ ընտրություններին մեծ ծախսերի տակ ընկնելու պատճառով չի կարողացել վճարը մուծել: Պետրոսյան -Ավագյան վիճաբանությունը երեկ հասավ նրան, որ երկու կողմերի համակիրները գյուղապետարանի շենքի մոտ սկսեցին փայտերով իրար ծեծել: Ի դեպ, գյուղի հարցը տեղափոխվել է նաև Ազգային ժողով, քանի որ գյուղապետը հանրապետական է, Վարդան Պետրոսյանին էլ սատարում է ՕԵԿ-ը, ուստի թունդ վիճաբանություններ են սկսվել ՕԵԿ-ի ու հանրապետականների միջև: ԱԺ պատգամավոր Հովհաննես Մարգարյանը ԱԺ ամբիոնից մի քանի օր առաջ դարձյալ գյուղապետին պաշտոնանկ անելու հարցն է բարձրացրել: Երեկ Սարգիս Ավագյանի համակիրները մեզ փոխանցեցին, որ իրենք էլ ստորագրահավաք են սկսել: Իսկ թե ինչու՞ են հաղթանակած թեկնածուի կողմնակիցները նման քայլ ձեռնարկում, նրանք մեկնաբանեցին. «Մենք Ավագյանին կողմ ենք» բովանդակությամբ տեքստը կառավարությանը ներկայացնելու ու այս ծեծկռտուքին վերջ դնելու նպատակով»: