Ստորեւ ներկայացնում ենք Եվրոպացի լրագրողների ընկերակցության նամակը՝ ուղղված ՀՀ նախագահ Սերժ Սարգսյանին, նոյեմբերի 17-ին Հետքի խմբագիր Էդիկ Բաղդասարյանի նկատմամբ տեղի ունեցած բռնարարքի կապակցությամբ: Մեծարգո նախագահ Սարգսյան, Մենք գրում ենք` արտահայտելու մեր զարմանքը եւ խորը մտահոգությունը նախորդ երկուշաբթի` նոյեմբերի 17-ին, մեր գործընկեր եւ Եվրոպացի լրագրողների ընկերակցության անդամ, «Հետք» էլեկտրոնային թերթի խմբագիր Էդիկ Բաղդասարյանի հանդեպ դեռեւս անհայտ անձանց կողմից կատարված դաժան հարձակման կապակցությամբ, որի արդյունքում նա ստացել է գլխի լուրջ վնասվածքներ` հիվանդանոցային բուժման անհրաժեշտությամբ:Ինչպես Դուք տեղյակ եք, պրն Նախագահ, սա ամենավերջինն է այն սարսափելի եւ չպատճառաբանված ֆիզիկական հարձակումների շարքից, որ տեղի են ունեցել ձեր երկրում այս տարվա սկզբից: Խիստ մտահոգիչ է իմանալ, որ շատ նման հարձակումներ են տեղի ունեցել մամուլի մասնագետների հանդեպ` անհայտ անձի կամ անձանց կողմից՝ ազատ եւ անկախ մամուլի աշխատանքը խոչընդոտելու կամ կանգնեցնելու ակնհայտորեն ծրագրված նկատառումով: Մտահոգիչ է իմանալ նաեւ, որ Հայաստանի ոստիկանությունը եւ դատական իշխանությունները մինչ օրս չեն կարողացել սահմանված կարգով բացահայտել պատասխանատուներին եւ հանձնել նրանց արդարադատությանը: Եվրոպացի լրագրողների ընկերակցությունը, որի անդամ են ավելի քան 20 եվրոպական պետությունների` այդ թվում նաեւ Հայաստանի, հազարավոր լրագրողներ, Լինցում` Ավստրիայում, նոյեմբերի 22-ին կայացած լիագումար նիստում ընդունել է որոշում` մեր բոլոր անդամների կողմից դատապարտելով այս եւ նման այլ հանցագործությունները: Մենք գիտենք, որ Հայաստանը, որպես Եվրոպայի Խորհրդի անդամ երկիր, ստանձնել է օրենքի իշխանության եւ մամուլի ազատության` այդ թվում նաեւ նման ակնհայտորեն կազմակերպված եւ դաժան հարձակումներից լրագրողների պատշաճ պաշտպանության ապահովման պարտավորություններ: Իշխանությունների կողմից ցանկացած հետագա ձախողում` միջոցներ ձեռնարկելու այս հարձակումները դադարեցնելու եւ դրանք իրագործողներին կամ պատվիրատուներին պատժելու նպատակով, կարող է ընկալվել որպես խախտում այն պաշտոնական պարտավորությունների, որոնք ստանձնվել են Եվրոպայի Խորհրդի եւ այլ միջազգային մարմինների առջեւ, ինչպես նաեւ Հայաստանի ազգային օրենքներով: Եվրոպացի լրագրողների ընկերակցությունը եւ այլ միջազգային կազմակերպություններ, որոնք պաշտպանում են մամուլի ազատության հիմնարար սկզբունքը, այժմ խիստ մտահոգությամբ եւ աչալրջությամբ են լցված: Մենք խնդրում ենք Ձեզ հստակորեն արտահայտել ձեր նվիրվածությունը ստանձնած պարտավորություններին` վճռական քայլեր ձեռնարկելով ձեր պետության լրագրողների անձնական անվտանգությունն ապահովելու համար: Անկեղծորեն Ձերը` Ուիլիամ Հորսլի, ԵԼԸ Մամուլի ազատության ներկայացուցիչ, Լոնդոն եւ Դիեգո Կարսեդո, ԵԼԸ նախագահ