ԼՂՀ ԱԺ պատգամավոր Վահրամ Աթանեսյանն օրերս հայտարարել էր, որ Հայստանում վերջին քննարկումները և քաղաքական դաշտում, տեղեկատվական ու փորձագիտական մակարդակով կարող են ստեղծել այնպիսի տպավորություն, որ հայ իրականության մեջ ղարաբաղյան կարգավորման մասին չկա վերջնական միասնական հայեցակարգ: «Հետքի» այն հարցին, թե արդյոք կա՞ մեկ միասնական տեսակետ Ղարաբաղում, Վ. Աթանեսյանը այսօր «Տեսակետ» ակումբում տեղի ունեցած ասուլիս ժամանակ պատասխանեց. «Լեռնային Ղարաբաղում կա հարցի կարգավորման մեկ միասնական տեսակետ`ԼՂՀ միջազգային ճանաչում`Արցախի ժողովրդի համար ընդունելի սահմաններում և անվտանգության ազգային համակարգի գերակայության պայմաններում»: Իսկ այն հարցին, թե Արցախում կա՞ հստակ պատկերացում, թե ինչպես պետք հասնել խնդրի վերջնական կարգավորմանը, երբ ԵԱՀԿ Մինսկի խմբի համանախագահ Բեռնար Ֆասիեն վերջերս Հայաստանում հայտատարել էր, որ ինքը չունի բանաձև: «Եթե մենք հարցին մոտենանք ֆորմալ առումով, թե ով է ստորագրելու և երբ է ստորագրելու, ապա դա ոչ ոք չի կարող գուշակել: Եթե հարցին վերաբերում ենք սկզբունքորեն, ապա, այո´, Լեռնային Ղարաբաղի Հանրապետությունում ձևավորված է հստակ պատկերացում կարգավորման մասին, կարգավորման պայմանագրի և պայամանգրի իրացման մեխանիզմների շուրջ, և այդ պատկերացումը պաշտպանելու ենք մինչև վերջ»,- ասաց Վ. Աթանեսյանը: Սակայն կոնկրետ մեխանիզմներ նա այդպես էլ չնշեց: