Եվրոպայի խորհրդի Մարդու իրավունքների հանձնակատար Թոմաս Համմարբերգը հատուկ այցով կգտնվի Հայաստանում նոյեմբերի 20-22-ը՝ մարտի 1-ի և 2-ի դեպքերի հետևանքով ազատությունից զրկված անձանց իրավիճակը և այդ դեպքերի կապակցությամբ իրականացվող հետաքննությունը գնահատելու նպատակով։ «Ես նպատակ ունեմ գնահատել ազատազրկված անձանց իրավիճակը և այն առաջընթացը, որը գրանցվել է մարտյան իրադարձությունների համար պատասխանատուներին ի հայտ բերելու առումով»,- ասել է նա։ «Կարևոր է, որպեսզի իրական և փաստացի նկարագրություն տրվի, թե ինչ է կատարվել իրականում։ Եթե դա կարելի է անել, ապա դա նաև օգտակար կլինի Հայաստանում մարդու իրավունքների պաշտպանության ոլորտում ապագա աշխատանքի համար»։ Այցի ընթացքում նա հանդիպելու է Հանրապետության Նախագահ Սերժ Սարգսյանի, Ազգային ժողովի խոսնակի, Արտաքին գործերի նախարարի, Ոստիկանության ղեկավարի և Գլխավոր դատախազի հետ։ Նա նաև հանդիպումներ է ունենալու Ազգային ժողովի նորաստեղծ՝ 2008թ. մարտի 1-2-ը Երևան քաղաքում տեղի ունեցած իրադարձությւոնների և դրանց պատճառների ուսումնասիրության ժամանակավոր հանձնաժողովի նախագահի և մարտյան դեպքերի հետաքննությամբ զբաղվող նորաստեղծ փաստահավաք խմբի անդամների, Մարդու իրավունքների պաշտպանի, ինչպես նաև միջազագային կազմակերպությունների և քաղաքացիական հասարակության ներկայացուցիչների հետ։ Հանձնակատար Համմարբերգը նաև կայցելի ազատազրկման վայրեր։ Սեպտեմբերին Հանձնակատարը հրապարակել է իր հետազոտության արդյունքները՝ նշելով, որ կա բանտարկվածների առնչությամբ գոհացուցիչ լուծումներ գտնելու և մարտյան իրադարձությունների համար մեղավորներին պատասխանատվության կանչելու հրատապ անհրաժեշտություն։