Տեսանյութեր
Լուսանկարներ
Ա. Միրիջանյան. «Կասկած չունեմ, որ շատ մոտ ապագայում մեղավորները կենթարկվեն պատասխանատվության»
Էդիկ Բաղդասարյանի նկատմամբ կատարված բռնությունն առաջին իսկ պահից ոստիկանության պետի կողմից վերցվել է հսկողության տակ: Կազմվել է օպերատիվ խումբ` փորձառու աշխատողների մասնակցությամբ, եւ կատարվում են անհրաժեշտ օպերատիվ-հետախուզական գործողություններ` հանցագործության շուտափույթ բացահայտման ուղղությամբ: Այս մասին այսօրվա ասուլիսում հայտարարեց ոստիկանության Երեւան քաղաքի վարչության պետի տեղակալ Աշոտ Միրիջանյանը:Հիշեցնենք, որ նոյեմբերի 17-ի երեկոյան աշխատանքից տուն վերադառնալիս երեք անհայտ անձինք հարձակվել էին «Հետքի» խմբագիր Էդիկ Բաղդասարյանի վրա եւ ծեծել նրան:
«Մենք հայտնաբերել ենք մեկ ականատես, որը մեր երիտասարդ աշխատակիցներից է, որը եւ բռնարարքի պահին հասցրել է իր մոտ գտնվող գազային ատրճանակից օդ կրակել` կանխելով բռնարարքի շարունակությունը: Նա աշխատանքից դուրս պատահաբար գտնվել է մոտակայքում: Ես անգամ կասկած չունեմ, որ շատ մոտ ապագայում մեղավորները կենթարկվեն պատասխանատվության,- ասաց Ա. Միրիջանյանը` նշելով, որ ինքը Բաղդասարյանի վրա հարձակվողներին նույնիսկ հանցագործներ չի համարում:-Միայն ճղճիմ մարդը կարող է փողոցում բռնել եւ լրագրողին ծեծի ենթարկել»:
Լրագրողները հարցրին, թե ինչո՞ւ է միջադեպի պատահական ականատես ոստիկանը հանցագործների փոխարեն հետեւել Է. Բաղդասարյանին:
«Ես չեմ զրուցել այդ աշխատակցի հետ, բայց մթության մեջ, երբ անտեղյակ ես որեւէ բանից, չես կարող պարզել, թե որ կողմ փախչողն է հանցագործը, որը` տուժողը: Դա սովորական լոգիկա է»,- պատասխանեց Աշոտ Միրիջանյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել