Այսօր փոխվարչապետ, տարածքային կառավարման նախարար Արմեն Գեւորգյանը Գեղարքունիքի, Շիրակի, Լոռու եւ Վայոց Ձորի մարզպետների հետ քննարկել է հիշյալ մարզերում սեփական եկամուտների, մասնավորապես` հողի եւ գույքահարկի հավաքագրման 2008 թ. տասն ամիսների արդյունքները: Այս մասին հաղորդում է նախարարության մամլո ծառայությունը: Հանրապետությունում հողի հարկի հավաքագրման ամենից ցածր արդյունքները գրանցվել են Գեղարքունիքի, Լոռու եւ Շիրակի մարզերում: Գեղարքունիքում այն կազմել է 32,8, իսկ գույքինը` 60 տոկոս, Լոռիում համապատասխանաբար` 44,2 եւ 53,9, Շիրակում` 46,8 եւ 39,9 տոկոս:Թեեւ ցուցանիշները համեմատաբար բարձր են Վայոց Ձորում`75 եւ 86,3 տոկոս, սակայն այստեղ էլ տասն ամիսների արդյունքներով արձանագրվել է նվազում: Աղբյուրի փոխանցմամբ` Արմեն Գեւորգյանը չորս մարզպետներին խստագույնս հանձնարարել է համապատասխան աշխատանք տանել համայնքների ղեկավարների հետª սեփական եկամուտների հավաքագրման տոկոսը բարձրացնելու նպատակով: Տարածքային կառավարման նախարարության կողմից հատուկ ուսումնասիրվել են այս համայնքների սեփական եկամուտների հավաքագրման մակարդակները, որոնցում մյուս տարի պետական բյուջեից նախատեսվում են իրականացնել կապիտալ ներդրումներ: Կատարված վերլուծության համաձայն` հաջորդ տարի կառավարության ներկայացրած նախագծով ներդրումներ են իրականացվելու 228 համայնքներում, որոնցից 32-ում 2008 թ. 9 ամիսների ընթացքում սեփական եկամուտների հավաքագրման մակարդակը կազմել է մինչեւ 30 տոկոս, 52-ում այն տատանվել է 30-50 տոկոսի, 74-ումª 50-75 տոկոսի սահմաններում եւ 70-ում ապահովվել է 75 տոկոսից բարձր հավաքագրման մակարդակ£