2008թ. նոյեմբերի 17-ին դաժան ծեծի է ենթարկվել “Հետաքննող լրագրողներ” ՀԿ նախագահ Էդիկ Բաղդասարյանը, ով հայտնի է իշխանության տարբեր կառույցների և պաշտոնատար անձանց կողմից ապօրինությունները բացահայտող հետաքննական հրապարակումներով: Հայաստանում արդեն սովորական են դարձել ֆիզիկական հաշվեհարդարները լրագրողների ու քաղաքացիական հասարակության ակտիվիստների հետ: Է. Բաղդասարյանի վրա հարձակումը ընդամենը հերթական դեպքն է նմանատիպ հանցագործությունների շարքում, որոնք մնում են չբացահայտված և դառնում շարունակելի: Ով է հաջորդը … Հայաստանի Հանրապետության քաղաքացին իրեն ապահով չի զգում ՀՀ Սահմանադրությամբ “ժողովրդավարական և իրավական” պետություն հռչակած մեր երկրում: Հասարակության ձայնը լռեցնելու և վախի մթնոլորտ սերմանելու ամեն մի գործողություն ընդամենը ուժեղացնում է հանրության վրդովմունքն ու դժգոհությունը: Ս.թ. նոյեմբերի 19-ին ժամը 18:00-ին տեղի կունենա բողոքի ցույց ՀՀ գլխավոր դատախազության առջև Մենք դատապարտում ենք իշխանությունների անգործությունը և պահանջում հանցագործությունների բացահայտում և մեղավորների պատժում: Նախաձեռնող խումբ