Հետքն արդեն տեղեկացրել է, որ մի քանի օր առաջ Գյումրիի քաղաքապետ Վարդան Ղուկասյանը Շիրակի հոգևոր թեմի առաջնորդ Միքայել եպիսկոպոս Աջապահյանին պաշտոնանկ անելու նպատակով սկսել էր ստորագրահավաք կազմակերպել նրա դեմ:

Հիշեցնենք, որ ընտրություններից առաջ խիստ սրվել էին նրանց հարաբերությունները, այն աստիճան, որ թեմի առաջնորդը քաղաքապետին հրապարակավ «կեղծ բարեպաշտ» անվանելով` ընտրողներին հասկացրել էր ձայն չտալ նրան:

Այսօր Վարդան Ղուկասյանը պատասխանելով Հետքի հարցին` ասաց, որ իր ու թեմի առաջնորդի հարաբերությունները միշտ եղել են իդեալական և որ նրա` ընտրություններից մեկ օր առաջ ունեցած ելույթը անակնկալ էր իր համար: «Մենք շատ լավ հարաբերությունների մեջ ենք, ես չգիտեմ` ով է դա տարածողը, մենք երբեք մի հատ թթու խոսք իրար չենք ասել, բացի հարգանքից, բացի սրբազանին ըստ արժանվույն գնահատելուց, ես ոչ մի բան չեմ արել: Ես զարմացած եմ, որ նա ընտրություններից առաջ դուրս է եկել ու իմ դեմ ելույթ է ունեցել: Ես եկեղեցապատկան հողերը չեմ վաճառել, ընդհակառակը` ես եմ եկեղեցուն հողեր տվել, կարող եմ ասել, որ հարյուրապատիկ անգամ, ինչքան որ ունեին, ավելացրել եմ, ես նորից պատրաստվում եմ եկեղեցու համար ամեն ինչ անելու: Թե նմանատիպ բաներ պտտվում է առաջնորդի կողմից` կապրենք-կտեսնենք, կա ըտենց բան, թե չկա: Ստորագրահավաքը իմ ձեռագիրը չէ, եթե բան ունենամ ասելու, ուղիղ ճակատին կասեմ: Հավանական է, որ ժողովուրդը` այն երեսունհինգ հազարը, որ ինձ ձայն է տվել, դժգոհ լինի, որ հոգևոր առաջնորդը զբաղվում է քաղաքականությամբ, կարող է և ժողովուրդը իր ձայնը, խոսքը ասի, բայց ես նմանատիպ բաներից ընդհանրապես տեղյակ չեմ, դրանք սադրանքներ են, ցավում եմ, որ հոգևոր թեմը քաղաքականությամբ է զբաղվում»,- ասաց քաղաքապետը` հոգեկան հիվանդներ անվանելով այն լրատվամիջոցներին, որոնք գրել են ստորագրահավաքի մասին:

Մենք փորձեցինք քաղաքապետ-հոգևոր թեմի առաջնորդ հարաբերությունների մասին պարզաբանումներ ստանալ նաև Միքայել եպիսկոպոս Աջապահյանից: Վերջինս շտապում էր Էջմիածին, այդ պատճառով հրաժարվեց պարզաբանումներ տալ, սակայն մեզանից հետաքրքրվեց, թե որն է իր մեղքը, ինչի մեջ է «ամբաստանվում»: Մեր այն դիտարկմանը, թե ինչու եք հրաժարվել օրհնել «Վարդանանց» արձանախումբը (քաղաքապետն է այս մասին դժգոհել), թեմի առաջնորդը հեգնեց. «Դրա համար ճիշտ կանեին ոչ թե ստորագրահավաք կազմակերպեին, այլ մահապատժի ինձ ենթարկեին":