«Մեր մանկության տանգոն», «Կյանքի լավագույն կեսը», «Ուրախ ավտոբուս», «Հին օրերի երգը» եւ մի շարք այլ ֆիլմերի ավելացել է տաղանդավոր ռեժիսոր Ալբերտ Մկրտչյանի` հայի մասին պատմող եւս մեկ ֆիլմ`«Տխուր փողոցի լուսաբացը» ֆիլմը, որը պատմում է 90-ական թվականների մութ տարիների, Ղարաբաղյան պատերազմի եւ հաղթանակի մասին, եւ թե ինչպես է հայը ապրել այդ ծանր տարիները: Նկարահանումները կատարվել են Գյումրիում եւ Լաչինում: «Ես չեմ կարող իմ ֆիլմին գնահատական տալ, սակայն Մոսկվայում իմ ընկերները շատ գովեցին, նույնիսկ Արմեն Մեդվեդեւն ասաց, թե այն իմ լավագույն ֆիլմն է: Իմ կարծիքով` ֆիլմը հաջողվել է, քանի որ Ղարաբաղյան պատերազմը լուծել եմ ոչ թե կրակոցներով, այլ մարդկային հոգեբանական պատերազմով: Դա ամենասարսափելին է: Մարդ սպանելը ամենահեշտն է, իսկ ես ատում եմ, երբ մարդը մարդուն սպանում է»,- ասաց Ալբերտ Մկրտչյանը: Գլխավոր դերերում են Անահիտ Քոչարյանը, Վարդան Մկրտչյանը եւ Արմեն Սարգսյանը: Ֆիլմը մեկ օր ցուցադրվել է Երեւանում, այնուհետեւ Գյումրիում: Առաջիկայում ֆիլմը կցուցադրվի նաեւ Հանրային Հեռուստատեսությամբ: Ալբերտ Մկրտչյանը համոզված է, որ մենք դեռ կունենանք Ֆրունզ, Փափազյան, Սոս Սարգսյան. «Մեր ազգի արգանդը դեռ չի չորացել, Ֆրունզից էլ լավը կլինի, բայց արդեն այլ ժամանակում: Նոր տաղանդներ դեռ շատ կգան: Իսկ ես արդեն անցնող երամից եմ…»: