Տեսանյութեր
Լուսանկարներ
Ճգնաժամի առաջին ալիքը հաղթահարված է, բայց սպասվում են նորերը
Այսօր վարչապետ Տիգրան Սարգսյանը ելույթ է ունեցել Ազգային ժողովում` 2009 թ. պետական բյուջեի նախագծի ներկայացման կապակցությամբ: Անդրադառնալով միջազգային ճգնաժամին` նա նշել է, որ Կենտրոնական բանկի հետ համատեղ ձեռնարկված միջոցառումները կառավարությանը հնարավորություն տվեցին դիմակայել համաշխարհային ֆինանսական ճգնաժամի առաջին ալիքին: Սակայն «այսօր խնդիր է դրված դիմակայել ճգնաժամի նոր ալիքներին»:Վարչապետի խոսքերով` գլոբալ ֆինանսական ճգնաժամը հանգեցրել է «կարճաժամկետ ֆինանսական միջոցների լայնածավալ արտահոսքի, զարգացող երկներում ներդրումային ծրագրերի կրճատմանը ու հետաձգմանը եւ շուկայի մասնակիցների միջեւ վստահության կորստին»: Միաժամանակ այն հընթացս հանգեցնում է «համաշխարհային ՀՆԱ-ի աճի տեմպերի նվազմանը, աշխատատեղերի կրճատմանը եւ գործազրկության աճին, շուկաներում հումքի եւ որոշ ապրանքների գների նվազմանը»:
Ըստ Տիգրան Սարգսյանի` ճգնաժամի առաջին դասերից ամենակարեւորը սոցիալական համերաշխության եւ վստահության մթնոլորտի ապահովումն է, ինչպես նաեւ`
ա) Ֆինանսական հատվածում խիստ վերահսկողություն եւ ռիսկերի բացահայտման ունիվերսալ գործիքների առկայության անհրաժեշտություն:
բ) Թափանցիկության կանոնների պահպանում, այդ թվում խոշոր ձեռնարկությունների գործունեության թափանցիկության եւ հասարակության կողմից վերահսկողության ապահովում:
գ) Հնարավոր ռիսկերի դրսեւորմանը պատժամիջոցների համարժեքությունը:
դ) Իրական եւ ֆինանսական հատվածում ռիսկերի բացահայտման միասնական մեթոդաբանության մշակում:
ե) Վերահսկող մարմինների համախմբվածության անհրաժեշտություն:
զ) Դրամավարկային եւ հարկաբյուջետային քաղաքականությունների համակարգման նոր սկզբունքների մշակում:
է) Մակրոտնտեսական կայունության խաթարման անթույլատրելիություն:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել