«Ամառային դպրոցը մի միջոց է օգնելու, որ որոշակի ֆորմալ կրթություն ունեցող մարդիկ լրացնեն են իրենց գիտելիքները: Մարդն անընդհատ վերապատրաստման կարիք ունի»,- Հետքին ասաց «Ազգային զարգացման գիտակրթական կենտրոնի » (ԱԶԴԿ) նախագահ Գայանե Ղուկասյանն այսօր ԵՊՀ-ում տեղի ունացած «Ամառային դպրոցներ» երկլեզու գրքույկի շնորհանդեսի ժամանակ: Գրքույկը նվիրված է վերջին հինգ տարիների ընթացքում Երեւանում անցկացված միջազգային ամառային դպրոցներին, որոնց մասնակցել են Հայաստանի եւ արտերկրի բուհերի դասախոսներ եւ վարչական աշխատողներ: Մասնակիցներին հիմնականում դասավանդել են Եվրոպայից հրավիրված դասախոսներ «Շրջակա միջավայրի կառավարում», «Կրթության կառավարումը Բոլոնիայի գործընթացի շրջանակներում», «Կրթության եռաստիճան համակարգը Բոլոնիայի գործընթացի շրջանակներում» թեմաներով: Ամառային դպրոցներն իրականացրել է ԱԶԴԿ-ն Երեւանի պետական համալսարանի եւ Բաց հասարակության ինստիտուտի հայաստանյան ինստիտուտի օժանդակությամբ: «Համոզված եմ, որ մոտ ժամանակներում ամառային դպրոցները կդառնան Հայաստանի բարձրագույն կրթության անբաժանելի մի մասը` առաջարկելով վերապատրաստման, գիտելիքների խորացման եւ փորձի փոխանակման հնարավորություններ» ,- ասաց Բաց հասարակության ինստիտուտի կրթության ծրագրերի ղեկավար Էվելինա Վարդանյանը: Հաջորդ ամառային դպրոցը կմեկնարկի ԵՊՀ-ում հաջորդ տարվա հունիսին «Կրթության եռաստիճան համակարգը Բոլոնիայի գործընթացի շրջանակներում» թեմայով: