ՀՀ վարչապետ Տիգրան Սարգսյանի որոշմամբ այսօր Սյունիքի մարզ են այցելել Էներգետիկայի ու բնական պաշարների նախարար Արմեն Մովսիսյանը, Աշխատանքի ու սոցիալական հարցերի նախարար Արսեն Համբարձումյանը, էկոնոմիկայի նախարար Ներսես Երիցյանը: Նրանք պետք է ծանոթանան լեռնահանքային արդյունաբերությունում ստեղծված իրավիճակին եւ ՀՀ վարչապետին ներկայացնեն առաջարկություններ` արձանագրված խնդիրների լուծման վերաբերյալ: Հիշեցնենք, որ անցած շաբաթ` նոյեմբերի 5-ին, բողոքի ցույց էին կազմակերպել Ագարակի պղնձամոլիբդենային կոմբինատի աշխատակիցները, քանի որ ընկերության գործադիր տնօրեն, ազգությամբ վրացի Գեորգի Դեւաձեն հայտարարել էր, որ 450 աշխատակցի ուղարկելու է հարկադիր պարապուրդի, 30 տոկոսով էլ իջեցնելու է աշխատավարձերը: Բողոքավորները պահանջում էին աշխատանքային պայմանների բարելավում ու տնօրենի հրաժարականը: Երկօրյա բողոքի ցույցը դադարեցվել էր Սյունիքի մարզպետ Սուրիկ Խաչատրյանի հորդորով, իսկ վրացի ղեկավարներն էլ փախել էին Ագարակից: Վերջիններս չկային նաեւ երկուշաբթի` նոյեմբերի 10-ին, երբ կառավարական պատվիրակությունը հանդիպեց Ագարակի պղնձամոլիբդենային կոմբինատի աշխատակիցների հետ: Ինչպես մեզ տեղեկացրին կոմբինատի աշխատակիցները, նախարարները մասնավորապես ասել են, որ սեփականատերերի հետ ձեռք բերված նախնական պայմանավորվածությամբ` ձեռնարկության 1333 աշխատակիցներից 300-ին կտրվի հարկադիր պարապուրդ` 3 ամիս ժամկետով, եւ համամասնորեն կիջեցվեն աշխատավարձերը` տնօրենից մինչեւ հավաքարար: Թե քանի տոկոսով կնվազեցվեն աշխատավարձերը` դեռ հստակ չէ, քանի որ վերջնական պայմանավորվածություն չկա սեփականատերերի հետ: Միաժամանակ, տնօրեն Գ. Դեւաձեն կշարունակի պաշտոնավարել: Ավելացնենք, որ դեռ շարունակվում է "Դինո Գոլդ Մայնինգ Քամփնի" ընկերության (Կապանի նախկին լեռնահարստացման կոմբինատ) 1526 աշխատակիցների` նոյեմբերի 8-ին սկսած գործադուլը: Գործադուլի առիթը գլխավոր տնօրեն Ռոբերտ Ֆալետայի նոյեմբերի 7-ի այն հայտարարությունն էր, որ միջազգային շուկայում թանկարժեք մետաղների գների անկման պատճառով պատրաստվում է կրճատել ձեռնարկության աշխատակիցների 60%-ին, իսկ 40%-ով էլ իջեցնել աշխատավարձերը: