Ինչպես տեղեկացրել են ԼՂՀ Գլխավոր դատախազության մամուլի ծառայությունից, երեկ դատախազությունում տեղի ունեցավ օպերատիվ խորհրդակցություն, որտեղ քննարկվեցին Վերահսկիչ պալատի կողմից ներկայացված նյութերի հիման վրա առողջապահության համակարգում կատարված ստուգումների արդյունքները: Գլխավոր դատախազի օգնական Սերգեյ Ստեփանյանը զեկուցման ժամանակ նշեց, որ ԼՂՀ առողջապահության նախարարության մի շարք օբյեկտներում կատարված ստուգումներով ի հայտ են բերվել ԼՂՀ քրեական օրենսգրքի եւ օրենքների ու ենթաօրենսդրական ակտերի պահանջների կոպիտ խախտումներ: Որոշ փաստերով հարուցվել են քրեական գործեր` ընդհուպ նաեւ դատական քննության ելքով: «Մասնավորապես, «Հանրապետական հիվանդանոց» ՓԲԸ-ի նախկին ղեկավարության կողմից կատարված հանցավոր արարքների փաստով դատախազությունում հարուցված քրեական գործը մեղադրական եզրակացությամբ ուղարկվել է ԼՂՀ ընդհանուր իրավասության առաջին ատյանի դատարան, որտեղ ընկերության նախկին տնօրենի եւ տնտեսվարի նկատմամբ կայացվել է մեղադրական դատավճիռ»,-նշվել է խորհրդակցության ժամանակ: Ստուգման նյութերով քրեական գործ է հարուցվել նաեւ առողջապահության նախարարության «Հակապալարախտային դիսպանսեր» ՓԲԸ-ի նախկին եւ ներկա տնօրենների նկատմամբ: Քննության ընթացքում լրիվությամբ վերադարձվել է պետությանը պատճառված նյութական վնասը: Նշված քրգործը կարճվել է մեղավոր անձանց կողմից գործուն զղջալու հիմքով: Տեղեկացնենք, որ Ղարաբաղի առողջապահության ոլորտի թերությունների եւ խախտումների մասին բազմիցս է խոսվել: Դա խոստովանում էին նաեւ պատասխանատու մարմինների ղեկավարները, սակայն բժիշկները հիմնականում պատասխանատվության կամ տուգանքների չէին ենթարկվում: Լավագույն դեպքում մասնագիտական սխալ թույլ տված բժշկին ստացիոնար համակարգից ժամանակավոր տեղափոխում էին այլ աշխատանքի, եւ որոշ ժամանակ վերապատրաստում անցնելուց հետո նորից վերականգնում նույն աշխատանքին: Նման դեպքեր եղել են եւ հանրապետական հիվանդանոցում, եւ ծննդատանը: Ճիշտ է մի քանի բժիշկների նկատմամբ նախկինում եւս քրեական գործեր են հարուցվել, սակայն դրանից վիճակը չի փոխվել, քանի որ նրանք հիմնականում պատիժ չեն կրել: Վերջերս ոլորտի հարցը քննարկվել է նաեւ ԼՂՀ վարչապետ Արա Հարությունյանի մոտ տեղի ունեցած հանրապետության առողջապահական համակարգի պատասխանատու աշխատողների հետ հանդիպման ժամանակ, որտեղ վարչապետն անբավարար է գնահատել առողջապահության ոլորտում բարեփոխումների ընթացքը, չնայած, որ տարեցտարի պետությունը շարունակում է ավելի շատ միջոցներ ներդնել համակարգում: Ի դեպ, վարչապետի խոսքերով, ԼՂՀ 2009թ. պետբյուջեով նախատեսվում է 400 մլն դրամով ավելացնել առողջապահության ֆինանսավորումը եւ այն լիովին ուղղել բուժաշխատողների վարձատրության բարձրացմանը: Ծրագրվում է աշխատավարձերն ավելացնել միջին հաշվով 30 տոկոսով: Անահիտ Դանիելյան