Ինչպես ամեն ուրբաթ, այսօր նույնպես մի խումբ կանայք հավաքվել էին գլխավոր դատախազության շենքի մոտ եւ վանկարկում էին «Ազատություն քաղբանտարկյալներին», «Ազատ, անկախ Հայաստան», «Պայքար, պայքար մինչեւ վերջ»: Հավաքվածների մեծամասնությունը հետընտրական իրադարձություններից հետո անազատության մեջ հայտնվածների կանայք ու հարազատներն էին: «Արդեն երեսուներորդ անգամ նամակ ենք հանձնում գլխավոր դատախազությանը, բայց պատասխան չկա: Սակայն միեւնույն է, կարծում ենք, որ ամեն մի փոքր ակցիա նշանակություն ունի եւ իր կարեւոր գործն անում է,- ասում է նախկին արտգործնախարար Ալեքսադր Արզումանյանի կինը` Մելիսա Բրաունը: - Իշխանությունները թող իմանան, որ մենք իրենց այսպես կոչված դատավարությունները չենք ընդունում: Եւ մեզ չի բավարարում, որ ժամանակ առ ժամանակ ոմանց բաց են թողնում: Եթե բոլորը չազատվեն, ուրեն մենք կգանք: Թեկուզ մեկ քաղբանտարկյալ մնա, մենք էլի կբողոքենք»: Մելիսա Բրաունի խոսքերով` անհնար է գուշակել, թե իրենց պայքարն ինչքան կտեւի. «Որովհետեւ դժվար է ասել, թե այդ հանցագործների (իշխանությունների) ուղեղում ինչպիսի մտքեր են պտտվում»: