Կառավարության այսօրվա նիստում վարչապետ Տիգրան Սարգսյանը բոլոր նախարարներին հանձնարարել է, համագործակցելով իրենց ոլորտին առնչվող գիտահետազոտական ինստիտուտների հետ, ներկայացնել այնպիսի ծրագրեր, որոնք կարող են հետաքրքրություն ներկայացնել ներդրողների համար եւ կնպաստեն մեր տնտեսության զարգացմանը: «Մենք մանրակրկիտ կուսումնասիրենք այդ նախագծերը, կտեսնենք, թե մեր գիտահետազոտական ինստիտուտները, Ազգային ակադեմիան ի՞նչ առաջարկներ են մշակել, որոնք կառավարության աջակցությամբ կարող են իրականություն դառնալ: Այսինքն` մեր առաքելությունը կայանալու է նրանում, որ ապահովենք կապը գիտության եւ մասնավոր հատվածի, իրական հատվածի միջեւ, ապահովենք ներդրումներ: Պետության աջակցությունը կլինի, որպեսզի իրատեսական ծրագրերը հնարավորին չափ սեղմ ժամկետում դառնան իրականություն», - ասել է վարչապետը: Նա առաջարկել է նաեւ ԳԱԱ-ին` ներկայացնել, թե գիտահետազոտական ինստիտուտներն ի՞նչ պատրաստի առաջարկներ ունեն, որոնք մասնավոր հատվածի հետ համագործակցելով, կարող են ներդրվել Հայաստանում: