ՀՀ վերահսկիչ պալատի աշխատակազմի մեթոդաբանության, տեղեկատվական տեխնոլոգիաների եւ միջազգային կապերի վարչության պետ Կարեն Առուստամյանն այսօր ներկայացրեց ՀՀ պետական բյուջեից հատկացված միջոցների հաշվին "Էջմիածին Ջրշին" ՍՊԸ-ի կողմից Հրազդան գետի հունի մաքրման եւ ափերի ամրացման, ոռոգվող հողատարածքների ջրապահովման շինարարական աշխատանքների նկատմամբ իրականացված վերահսկողության ընթացքում կազմված արձանագրությունները: "Էջմիածին Ջրշին" ՍՊԸ-ն շահել էր Գյուղնախարարության մրցույթը, ընդ որում` 3 ծրագիր իրականացնելու համար: Դրանք ուսումնասիրվել են, եւ հայտնաբերվել է 30 մլն դրամի չարաշահում` չկատարված աշխատանքների դիմաց վճարված գումար, եւ այս մասով առաջարկվել էր, որպեսզի ընկերությունը կամ գումարը փոխանցի պետական բյուջե, կամ էլ կատարվեն համապատասխան աշխատանքները: Ստուգումներից հետո կազմակերպության կողմից եղել են առարկություններ, իսկ Վերահսկիչ պալատը դիմել է մասնագիտական "Հայջրնախագիծ" ինստիտուտին, որը տվել է մասնագիտական եզրակացություն, ըստ որի` պետությանը հասցրել են 33.3 մլն դրամի վնաս, բացի այդ` ինստիտուտը ամբողջ կառույցը գնահատել է որպես անարդյունավետ, քանի որ 15 տարի օգտագործման ենթակա կառույցները փլվել են: ՀՀ վերահսկիչ պալատի գլխավոր աուդիտոր Խաչիկ Վարդանյանը ներկայացրեց "Պետական աջակցություն ՀՀ մանկական խնամակալական կազմակերպությունների շրջանավարտներին" ծրագրերի կատարման նպատակով հատկացված բյուջետային միջոցների օգտագործման նկատմամբ իրականացված վերահսկողության արդյունքների վերաբերյալ ընթացիկ հաշվետվությունը: Սեպտեմբերի 10-ից Վերահսկիչ պալատը սկսել է ստուգումները, իսկ նույն ամսվա 25-ին ավարտել, սեպտեմբերի 28-ին կազմվել է արձանագրություն, իսկ նույն ամսվա 29-30-ը 296 մլն դրամ վերականգնվել է պետական բյուջե ծրագիրն իրականացնող "Սոկոլ գրուպ"-ի կողմից: Վերահսկիչ պալատն առանձնացնում է երկու խնդիր` չկատարված ծրագրեր, որը լուծվեց, եւ արդյունքը եղավ 296 մլն դրամի վերականգնումը պետական բյուջե, եւ կատարված ծրագրերի խնդիրը, որը պատճառ է դարձել, որպեսզի Վերահսկիչ պալատը դատախազություն դիմելու որոշում կայացնի: Կատարված ծրագրերի խնդիրը հետեւյալն է. պետք է կազմակերպության կողմից գնվեին մեկ սենյականոց տիպային բնակարաններ` առանձին կոմունալ հարմարություններով, ջեռուցման համակարգով, սանհանգույցի պատերը եւ հատակը պետք է լինեին սալիկապատված, բնակելի մասի հատակը` մանրահատակից, բնակարանը պետք է լիներ բնակության համար պատրաստի վիճակում եւ չունենար վերանորոգման կարիք, մինչդեռ արձանագրվել է ջեռուցման համակարգի եւ մանրահատակի բացակայություն, 13 բնակարաններ գտնվել են ոչ բնակելի տարածքներում` տեխնիկական հարկերում: Այս ամենը պատճառ է դարձել, որպեսզի Աջափնյակում ստացած իրենց բնակարանները լքեն 7 բնակիչներ