Հօգուտ երկրի բյուջեի 2007 թ. ընթացքում պետական մարմինները հարուցել են 5109 հայց` 9 մլրդ 162 մլն դրամ և 3 մլն 400 հազար ԱՄՆ դոլար բռնագանձելու պահանջով: Այս մասին տեղեկացնում է գլխավոր դատախազության կայքէջը: Աղբյուրի փոխանցմամբ` «ներկայացված հայցերից բավարարվել է 56 տոկոսը` 6 մլրդ դրամի չափով: 80 հայց բավարարվել է մասնակի, իսկ 457-ը մերժվել է: 694 քաղաքացիական գործի վարույթ կարճվել, և դատաքննության ընթացքում պատասխանողների կողմից պետական բյուջե է վճարվել 364 մլն դրամ և 1 մլն 382 հազար ԱՄՆ դոլար: Ընթացքի մեջ է 992 հայցերի քննություն, որոնցով բռնագանձման ենթակա ընդհանուր գումարը կազմում է 2 մլրդ 417 մլն դրամ և 1 մլն 943 հազար ԱՄՆ դոլար»: Գլխավոր դատախազության պետական շահերի պաշտպանության վարչությունն ուսումնասիրել է պետական մարմինների` մի շարք նախարարությունների, Կառավարությանն առընթեր հարկային եւ մաքսային պետական կոմիտեների, պետական գույքի կառավարման վարչության, անշարժ գույքի կադաստրի պետական կոմիտեի և Երևանի քաղաքապետարանի կողմից 2007թ. ընթացքում հարուցված կամ նրանց դեմ ներկայացված հայցերի, դրանց հիման վրա ընդունված դատական ակտերի հիմնավորվածության, բողոքարկման ու կատարման ուղղությամբ իրականացված աշխատանքների ընթացքում պետական շահերի պաշտպանության վիճակը: «Պետական մարմիններում բարելավվել է վարչարարության գործընթացը, պետության շահերի պաշտպանության բնագավառում հարուցված հայցերի, դատական ակտերի դեմ բերված վերաքննիչ և վճռաբեկ բողոքների որակը, սակայն նշված բնագավառում արձանագրվել են նաև մի շարք թերություններ ու բացթողումներ»,- նշված է հաղորդագրությունում: Մասնավորապես` վերաքննության կամ վճռաբեկության կարգով չեն բողոքարկվել վիճելի դատական ակտերը, դրանց դեմ վճռաբեկ բողոք ներկայացնելու միջնորդություններ չեն ուղարկվել գլխավոր դատախազություն կամ միջնորդությունները ներկայացվել են սահմանված ժամկետների խախտումներով, ինչը դատախազությանը զրկել է անօրինական և չհիմնավորված դատական ակտերը բողոքարկելու հնարավորությունից: Արձանագրվել են նաեւ կատարողական թերթերն անհարկի ուշացումներով կատարման ուղարկելու դեպքեր: