2008 թվականը ղարաբաղցիներից շատերի համար թերեւս հաջողակ էր այն առումով, որ որոշ «ծառայությունների» համար ստիպված չեն եղել լրացուցիչ գումարներ ծախսել: Օրերս ծանոթ վարորդներիցս մեկը հիշելով դրանք մատնանշեց, որ 2008-ին վերացավ ճանապարհատրանսպորտային ոստիկանության տեսուչների կողմից վարորդներից գումարներ վերցնելու երեւույթը:

Ճիշտ է, փոփոխությունը ճանապարհատրանսպորտային կանոնները հաճախակի խախտող վարորդների շրջանում դժգոհության առարկա է դարձել, բայց երեւույթն ինքնին դրական է: «Նման տեսակի «կաշառք» չեն վերցնում նաեւ բժշկափորձագիտական հանձնաժողովում, որի որոշումների համաձայն մարդկանց հաշմանդամության կարգ է տրամադրվում»,-այս մասին փաստում են հերթական ստուգումն անցած բնակիչներից շատերը: Մնացած բնագավառներում նման երեւույթների մասին Ղարաբաղում դեռ չեն խոսում: Ավելին` լրացուցիչ գումարներ են շարունակում վերցնել առողջապահության բնագավառում: Ոլորտում ԼՂՀ Ազգային վիճակագրական ծառայության կողմից բնակչության շրջանում կատարված հետազոտության համաձայն, բուժման համար մարդիկ կատարել են նաեւ լրացուցիչ վճարումներ, ընդ որում` գյուղական բնակավայրերի բնակիչներն լրացուցիչ համարյա 4 անգամ ավելի շատ գումար են վճարել, քան մայրաքաղաքի բնակիչները: Լրացուցիչ վճարված միջին գումարը մեկ մարդու հաշվով կազմել է 68 հազար դրամ: