Տեսանյութեր
Լուսանկարներ
Աղդամով անցնող ճանապարհները կվերանորոգվեն
Այն խոսակցությունները, թե Աղդամով անցնող ճանապարհները չեն վերանորոգվում տարածքների հանձնման տրամադրվածության պատճառով, դեկտեմբերի վերջին օրերին հրավիրած մամուլի ասուլիսի ընթացքում հերքել է ԼՂՀ վարչապետ Արա Հարությունյանը:
Պատասխանելով Հետքի այն հարցին, թե երբ է նախատեսվում վերանորոգել Ստեփանակերտ-Աղդամ-Մարտունի ճանապարհահատվածը, վարչապետը շեշտել է, որ Ստեփանակերտ-Աղդամն արդեն վերանորոգված է եւ 2009-ին նախատեսվում է կապիտալ վերանորոգման աշխատանքներ իրականացնել Աղդամ-Մարտակերտ ճանապարհահատվածում, որը, նրա բնորոշմամբ, ավելի անմխիթար վիճակում է գտնվում:
Վարչապետի հավաստմամբ, 2010 թվականին արդեն Աղդամ-Մարտունի ճանապարհահատվածի մասին կարող են խոսել: Նա միաժամանակ ընդգծեց, որ այդ ճանապարհահատվածը չվերանորոգելու պատճառը ոչ թե տարածքների հանձնման պատրաստակամությունն է, այլ` ֆինանսական ռեսուրսների սղությունը: «Եթե այդ ռեսուրսները լինեն մենք պատրաստ ենք նաեւ վերանորոգել Աղդամ-Ղարբանդ ճանապարհահատվածը»,-ավելացրել է ԼՂՀ վարչապետը:
Տեղեկացնենք, որ կարեւոր նշանակություն ունեն երկու` Աղդամ-Մարտակերտ եւ Աղդամ-Մարտունի ճանապարհահատվածները: Աղդամ-Մարտունի ճանապարահատվածով են անցնում Ստեփանակերտ-Մարտունի երթուղային տաքսիները, ինչպես նաեւ Մարտունու շրջանի Աշան, Բերդաշեն, Նոր շեն, Եմիշճան եւ մի քանի գյուղերի երթուղայինները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել