Այսօր ԼՂՀ հանրային ծառայությունները եւ տնտեսական մրցակցությունը կարգավորող պետական հանձնաժողովի նախագահ Վաչե Ադամյանը մամուլի ասուլիս է հրավիրել, որի ընթացքում ամփոփել է 2008թ. կատարված աշխատանքներն ու խոսել անելիքների մասին: Նրա տեղեկացմամբ, հանձնաժողովն իր 18-ամսյա գործունեության ընթացքում կայացրել է 97 որոշում, այդ թվում` 36-ը էներգետիկայի, 22-ը` հեռահաղորդակցության բնագավառում, իսկ մնացածները ջրային, փոստային կապի, տնտեսական մրցակցության ոլորտներում եւ այլն: 2008թ. ընթացքում հանձնաժողովը վերանայել է նաեւ բնակչությանը մատակարարվող բնական գազի, էլեկտրաէներգիայի մատակարարման սակագները: «Հեռահաղորդակցության բնագավառում հանձնաժողովը պատրաստվում է նախաձեռնությամբ հանդես գալ եւ փորձել մեղմել գործող սակագները»,-նշել է Վ.Ադամյանը: Նա միաժամանակ տեղեկացրել է, որ հանձնաժողովի երեկ կայացած նիստում հացամթերք արտադրող ձեռնարկություններում ուսումնասիրություն անցկացնելու որոշում է կայացվել, ինչը թույլ կտա 2009 թվականին իրականացնել այդ գործընթացը: «Մենք դիմել ենք համապատասխան կազմակերպությունների ներկայացուցիչներին` հացի փոփոխվող գները համապատասխանեցնելու տնտեսական մրցակցության պաշտպանության օրենքի պահանջներին: Այսօր արդեն ինձ հայտնել են, որ 3 կազմակերպություն խանութներում հացի գինը նվազեցրել են 10 դրամով, ինչը շատ ուրախալի է եւ ողջունելի, որովհետեւ ըմբռնումով են մոտեցել հանձնաժողովի առաջարկությանը»,-նշել է հանձնաժողովի նախագահը, որի կարծիքով, ալյուրի գինը իջել է, ուստի հացի գինը նույնպես պետք է համարժեքորեն իջնի: «Մակերեսային ուսումնասիրություններից ելնելով մենք այն կարծիքին ենք, որ 10 դրամը համարժեք չէ ալյուրի գնի իջեցմանը»,-ավելացրել է Վ.Ադամյանը, նշելով, որ այդ ուղղությամբ մանրամասն ու խորը ուսումնասիրություն անելուց հետո միայն կարող են ասել, թե ինչքան պետք է լինի, ասենք, հացի գինը: Տնտեսական մրցակցության ոլորտում խախտումների, խտրականության եւ այլ երեւույթների բացառմանն է ուղղված նաեւ տնտեսական մրցակցության պաշտպանության օրենքում ամրագրված պատժամիջոցները, որոնք, ըստ հանձնաժողովի նախագահի, հասնում են մինչեւ 300 մլն դրամի, ինչը մեր գործարարների համար խիստ պատժամիջոց կարելի է համարել: Այն հարցին, թե որեւէ կազմակերպության նկատմամբ արդեն կիրառվել է վերոնշյալ պատժամիջոցը, հանձնաժողովի ղեկավարը պատասխանեց, որ նման փաստ չի գրանցվել «այն պարզ պատճառով, որ հանձնաժողովը երբեք ուսումնասիրության չի ենթարկել որեւէ հարց», ինչը պայմանավորված է ինչպես հանձնաժողովի մասնագետների սակավությամբ, այնպես էլ` ցածր աշխատավարձերով : Նա նաեւ ավելացրել է, որ ցածր աշխատավարձի պատճառով արդեն 3 մասնագետ տեղափոխվել է այլ աշխատանքի: